Caencingz dwg gij gyaez ceiq hungmbwk gwnz seiqgyaiq, de dwg baez diemj baez di doxcienz, hawj raeuz raeujrub.

Ngoenzneix banringz, gou caeuq Cih Dan、Maj Danh daeuj hagdangz, byaij haeuj daihding seiz, dou yawjraen daxgoeng he doeng yawj sae muengh, de daenj aen mauh saekmok he, buh miz di gaeuq lo, daenj gouh haizbaengz he, yawj daeuj gig geq. Daxgoeng ndaw fwngz dawz bingz raemx he, baez yawj couh rox dwg soengq raemx daeuj hawj lan. Dou mbouj haeujsim, youh gangj youh riu hwnj laeuz, gou mbouj haeujeiq yawj dauqlaeng mbat he, fatyienh daxgoeng gaenriengz dou hwnj laeuz, fajfwngz cocatcat de hox gij fuzsouj mbaeklae, de moix yamq hwnj mbaek lae he, cungj naiqnueknuek, hawj vunz yawj le haemq nanzgvaq. Daxgoeng yaek benz daengz ngeih laeuz seiz, miz daeg nyez he buet gvaqdaeuj, duet aeu bingz raemx ndaw fwngz daxgoeng, gou siengj: Mbat neix ndei lo, daxgoeng hwnj laeuz mbouj yungh baenzneix dwgrengz lo, daeglan de itdingh gig docih daxgoeng. Hoeng dangqnaj gij saeh neix dauq hawj dou doeksaet lo, daeg nyez haenx mboujdanh mbouj docih daxgoeng, lij hat naeuz:“Hwnj laeuz baenz menh, gou yaek hozhawq dai lo.”Yienzhaeuh caeuq doengzhag buet ma gyausiz lo. Daxgoeng naj mbwngmbwt, youh menhmenh roengz laeuz lo. Yawj daengz neix, ndaw sim gou lumj gyan gaemz rin he, hojsouh dangqmaz.

Seizneix siengj hwnj gij saeh gyangngoenz, ndaw sim lij hojsouh. Daxgoeng gyaez lan hawj dou gamjdoengh, hoeng daeg lan haenx dauq hawj gou siengj haujlai. Daeglan nyinhnaeuz daxgoeng ndiep de dwg wnggai, de couh lumj boux “vuengzdaeq iq”, daengx ranz cungj baenq henz ndang de. Bouxboux cungj gyaez de ndiep de, de dauq mbouj simdoengh saek di, vahsug naeuz “mbouj ciengx lwg mbouj rox bohmeh sinhoj”, gou siengj daengz mwh de hix baenz goeng seiz, de hix mbouj siengj daeglan baenz neix doiqdaih de ba! Gizsaed gij saeh neix youq ndaw nyez dou gig lai gig lai, dou wngai daj ndaw saeh iq hag guh vunz、guh saeh.

Daxgoeng ndiep lan ndiep daengz gyaeuj daengz din, mbouj louz saek di. Dou aeu docih de, bauqdap de cij deng.

(haj nienzgaep Yenz Gvanh)