Roeg youq sang guh rongz

Ciengq go hongz byaifaex

Duzrwi dawz va daeh

Ciengx ndaej daengx rongz imq

Vunz guh hong reihnaz

Sou ndaej ma haeux byaek

Sinhoj dawz rapnaek

Yaek gvaq saedceij ndei

Mbangj boux baengh miz cienz

Bae fanden cingj haeux

Gwn noh youh gwn laeuj

Byaek lw daeuj byongh daiz

Ngeix dauq geij bi gonq

Cienzgoenggya cingjhek

Ndaw ranz mbouj hai rek

Beksingq yawj caengz da

Cienzgoenggya bae liuh

OK guek riuhoho

Daengz Suisw Meijgoz

Sai cienz goj mbouj noix

Ci gyoenggya gag yungh

Cienzyouz cungj mbouj hai

Danghnaeuz ci ngaiz vaih

Cienzcoih caiq bauqsiu

Daj bineix gvaq ma

Fanjfuj ca ndaej gaenj

Canghlenz gaem ndaej maenh

Dangjfungh baenz cinghseuq

Gaenxmbaet dwg cungj rengz

Deng Cunghvaz meijdwz

Son lwglan haeuj rwz

Mwhmwh geiq ndaw sim

Gaenxmbaet couh dwg ndei

Ceih gya aeu guh bonj

Guhvunz byaij bae gonq

Gyonj daeuj dwg fouqmiz

Guekgya aeu gaenxmbaet

Haethaemh rox leix caiz

Guekgya fazcanj vaiq

Caez byaij haeuj siujgangh