Vunz daengz cungnienz, mbouj you mbouj heiq caeuq simlangh liz raeuz yied bae yied gyae, diuzrap gwnzmbaq yied daeuj yied naek. Gwnz miz bohmeh nienzgeij laux lo, laj miz lwg’iq lij mbouj caengz baenzvunz, gyoengqde muengh raeuz ciuqgoq muengh raeuz buenx. Hoeng, seizneix hix dwg raeuz bonjfaenh gij hong ceiq lai ceiq nyaengq seiz, siengj guh daengz ndaw ranz caeuq hongrog cungj ciuqgoq daengz caemhcaiq guh ndaej ndei, saedcaih dwg mbouj yungzheih ha. Baenz bouxvunz cungj roxyinh naetnaiq raixcaix. Hoeng cungj naet neix, hix dwg cungj vuenyungz ndeu.

Gwnz miz bouxlaux dwg vuenyungz. Ndaw ranz lij miz bohmeh youq, yamq haeuj douranz, heuh sing boh sing meh,raeuz couh ndaej roxnyinh aenranz gig raeuj sim hix miz gij baengh, hix cij ndaej roxnyinh gwn ndaej diemz ninz ndaej ndaek. Danghnaeuz saehnieb saetbaih lo roengzrengz lij miz ngoenz dauq hwnq, bohmeh aencingz naek lumj bya, seizneix mbouj hauqgingq, seizgan mbouj rox byaij doxdauq ha, raeuz baenzlawz ndaej cajdaengz gyoengqde bae le cij louz roengz sim’in ienqhoij baenzseiq.

Laj miz bouxiq dwg vuenyungz. Lwg’iq dawz gij sengmingh raeuz ciep ndaej engq raez, de dwg gaiq dangzrwi ceiq van ceiq diemz ndaw sim raeuz. Daj gwnz ndang bouxlwg, raeuz yawjraen le daengzcog gij ceiq gyaeu ceiq ndei, yawj- raen le fouzcaenh maqmuengh. Bouxlwg son raeuz rox le baenzlawz bae gyaez, gyaez ndaej mbouj ienqhoij. Ndaw swnghhoz raeuz miz haujlai mbouj hab- eiq, haujlai haemzhoj, aenvih miz bouxlwg le, aensim raeuz cij ndaej daengz onj, cij ndaej dawz gij mbouj angq lumz bae, sawj swnghhoz raeuz engqgya miz yinxdaeuz.

Gwnz miz bouxlaux laj miz bouxiq seiz, raeuz wngdang roxyinh vuenyungz. Bohmeh lij youq seiz, raeuz ndaej miz gihvei hauqgingq gyoengqde, ndaej nem henz ndang gyoengqde, lij ndaej guh boux lwgnyez ciengxlwenx maj mbouj hung ndeu, seizseiz ndaej daengz gvensim mbouj liux mbouj caenh. Aenvih bouxlwg lij iq, lij yungh raeuz bae ciengx bae son, raeuz cij miz le maqmuengh caeuq muzbyauh, cijmiz gij sim sawj raeuz bae roengzrengz guhhong.

Miz bohmeh miz lwg, cij miz ranz miz gyaez. Vih aenranz raeuz gvaq ndaej ndei, mboujguenj bungz daengz geijlai dwg- rengz, geijlai naetnaiq, hix dwg gij swnhhoz ceiq vuenyungz.

Seiqgyaiq neix, miz diuz rap ndeu heuhguh gwnz miz bouxlaux laj miz bouxiq, miz cungj cwzyin ndeu heuhguh gwnz miz bouxlaux laj miz bouxiq, caemhcaiq miz cungj vuenyungz ndeu heuhguh gwnz miz bouxlaux laj miz bouxiq.