Vihliux fazveih gij akcawq Guengjsae okdaeuj, Guengjsae gonqlaeng laebbaenz le gooij yenzgiusoj、linzyez gohyoz yenzgiusoj、 doihduz yenzgiusoj、yw bingh doenghduz yenzgiusoj、suijcanj yenzgiusoj、mbawcaz yenzgiusoj、sojsonyinx ciengx nonsei、gomakgam yenzgiusoj daengj gij gihgou conhyez gohyoz yenzgiu neix. Gij gihgou yenzgiu gohyoz neix doiq yenzgiu caeuq sonyinx Guengjsae guh lai cungj ginghyingz, miz gij cozyung gig daih. Veiz Gozcingh gig yawjnaek gij yenzgiu soj neix, gingciengz bae dingq gij yigen gyoengqde.

Boux sojcangj sojsonyinx ciengx nonsei Vangz Gauhsun, yienzlaiz dwg Sanghaij aen swnghvuz yenzgiusoj boux lauxhangz ciengx nonsei ndeu, dwg youz Swcigih Gohveij boux cujyin gonq Se Dunghlaiz doihawj cingj daeuj Guengjsae guh hong. Se Dunghlaiz genyi: “Dwg mbouj dwg hawj Vangz Gauhsun daeuj guh boux sojcangj mingzdaeuz Sojsonyinx Ciengx Nonsei?” Veiz Gozcingh naeuz: “Mbouj! De couhdwg sojcangj, miz mingzdaeuz caemh miz gienz.” Veiz Gozcingh lij daengq naeuz:“Hwnj aen ranz he hawj de, ndaw ranz aeu miz rugninz、ranzbanhgoeng、diengzsaw、ranzdajcawj. Danghnaeuz de mbouj sibgvenq gwn ngaiz Guengjsae, couh cingj boux canghdajcawj rox guh ngaiz Sanghaij haenx daeuj cawj ngaiz hawj de gwn.” Bi 1964 seizdoeng, Vangz Gauhsun daiq bang vunz ndeu daeuj, guh hong gig miz cingzyauq. Bi 1965, daengx swcigih yungh mbawmaenzfaex daeuj ciengx nonsei gocoengh, vunzlai guh ndaej hoenghhwdhwd, ciengx gij cungj nonsei ndaej 118 fanh lai hab, okcanj reh ndaej 1614 dun. Guengjsae vihneix youq Namzningz、Denzyangz caeuq Gveilinz gak laebbaenz aen cangj daemjgien ndeu. (caengz sat)