Conhgyah naeuz, baenz mbiengj gyaeuj in, mboujdanh hawj vunzbingh youq haemz youq hoj, engq hawj cingsaenz vunzbingh deng muznyed dem. Seizdoeng dwg aen geiqciet yungzheih yaeuhfat baenz mbiengj gyaeuj in ndeu, vih hawj vunz noix baenz cungj bingh neix, vunzbingh caeuq cawjranz ndaej daj baihlaj geij aen fuengmienh bae fuengzhoh:

Haeujsim bauj raeuj aen’gyaeuj: Aenvih mbiengj gyaeuj in dwg aenvih mbwn nit lai yaeujfat baenz, vunzbingh seizdoeng wng caenhliengh siuj soengz youq rogranz daiq nanz, danghnaeuz itdingh aeu okbae, wng daenj mauh bauj raeuj aen’gyaeuj.

Gaej ciepcuk dennauj densi daiq nanz: Aenvih bauj raeuj sihyau, vunzbingh soengz youq ndaw ranz seizgan nanz, vunzbingh youq mbwq couh hai dennauj yawj densi, nanz le lwgda naetnaiq gvaqbouh, daengzlaeng yaeuhfat baenz mbiengj gyaeuj in.

Guhhong yietnaiq doxgiethab: Seizdoeng, vunzbingh wng gag cuengqsoeng swhgeij, gemjsiuj cingsaenz gaenjcieng, gaej naetnaiq gvaqbouh. Ndaej cimq raemxraeuj roxnaeuz guh di yindung soengset ndeu. Doengzseiz, vanzging vunzbingh aeu baujciz caemcingx, gwn ninz baujciz miz gvilwd, ciuqseiz haeujninz, gaej ngauzhwnz.