Haeujsim 1：Ciengx mak guh goek. Seizdoeng, heiqyiengz ndang vunz sousuk, sengleix hozdung ndang vunz hix miz di sousuk. Ndigah, aenmak aeu rom miz cukgaeuq ndat daeuj veizciz aenndang doh gvaq seizdoeng, ciengx mak daegbied youqgaenj. Gwnndoet seizseiz aeu haeujsim diuzciengx aenmak, haeujsim bouj gwn di duh caeuq nohma、nohyiengz、nohhanq、nohbit、makhwzdauz、maklaeq、raetmoegngaex、lwgraz、lwgmaenz、lauxbaeg daengj doxgaiq.

Haeujsim 2: Gwn raeuj geih ndongj. Gijgwn niu ndongj、ndip gyoet yungzheih sieng dungx, gijgwn ndat lai rox sieng saihoz, gwn roengz dungx le lij rox rom ndat hawj ndang vunz ndaej bingh; gijgwn daiq gyoet yungzheih gig sailwed aendungx, lwed lae mbouj swnh, lwed noix couh rox yingjyangj daengz lwed bwtdaep lae baedauq, sonjhaih ndang vunz gengangh. Ndigah, gijgwn seizdoeng hab raeujndat unqmboeng.

Haeujsim 3: Seizdoeng goengnaengz aenmak bien vuengh, danghnaeuz caiq gwn di gijgwn ndaengq roengzbae dem, heiq mak couh engq vuengh, sienghaih aen’daep engq youqgaenj. Ndigah, seizdoeng aeu lai gwn di gijgwn haemz ndeu daeuj demgiengz goengnaengz aenmak. Lumj maklangz、makgam、daepmou、daepyiengz、byaekdaeuzcaiq、byaekohswnj、raemxmeiq、caz daengj.