Boux baenz gvanhsinhbing doiq rumznit swgiz gig minjganj, aenvih nitgyoet ndaej hawj sailwed naengnoh sousuk、raemhrwnh beng haen, lwed niu gwd caemhcaiq lae menh, gyanaek fudanh aen’daep, yungzheih hawj gvanhsinhbing fukfat.

Doengzseiz, rumznit swgiz lij ndaej cigciep yinxhwnj gvancang doenghmeg raemhrwnh beng haen, yinxbaenz sim noix lwed noix yangjgi, yaeuhfat baenz sim geuj in roxnaeuz gipsingq sim saek dai daengj gvanhsinhbing. Ndigah, boux baenz gvanhsinhbing seizdoeng aeu haeujsim baihlaj geij aen vwndiz:

1、Gaengawq aenmbwn bienqvaq cingzgvang, gibseiz dem daenj buhvaq daeuj bauj raeuj dingj nit. Daegbied dwg mbwnnit rumznit、givwnh raemhrwnh doekdaemq seiz, aeu lai daenj buhvaq, fuengz aenndang dwgliengz deng nitgyaengj, daenj buhvaq aeu ciuqei mbaeu youh fuengbienh aen yenzcwz neix, mboujnex, buh daiq na roxnaeuz haiz daiq naek rox demgya simdaeuz fudanh, bingh engq haeuj naek. Ngoenz mbwnnit ceiq ndei mbouj ok rog bae youz.

2、Habdangq lienhndang. Ngoenz mbwn’gvengq mbouj daiq nit seiz, ndaej ok rog ranz bae lienhndang, hawj aenndang lai dingj ndaej nit.

3、Yungh raemxgyoet swiq naj, raemxraeuj caemxndang, hawj naengnoh lai dingj ndaej nit. Lij aeu cizgiz fuengzceih dwgliengz caeuq heiqguenjyiemz dem.

4、Caenhliengh baehmienx ndawranz rogranz dohraeuj doxca daiq lai. Boux baenz gvanh- sinhbing gaej raemhrwnh lizhai ndaw rug ok rog bae youzcet. Itdingh aeu okbae seiz, ceiq ndei sien youq ndawranz youzbyaij yaep ndeu hawj aenndang sikhab baihrog vanzging caiq okbae. Linghvaih, boux baenz gvanhsinhbing ndaw rug aeu baujciz raeujrub, danhseih gaej ndat lai, mienxndaej dohraeuj ndaw rug caeuq baihrog doxca daiq lai.