武鸣县太平镇庆乐小学六年级2班 危泓璟

Ranzmbanj gou gingjsaek gyaeundei. Mbanj baihlaeng dwg goengq bya’iq ndeu, daengxbi cungjdwg heuswdswd. Miz diuz rij gvaengx gvaq ranzmbanj caeuq goengq bya’iq, raemxrij cingxdikdik couh lumj diuz sainyawh ityiengh. Geij bi neix daeuj, lajmbanj ginghci fazcanj gig vaiq, ndaw mbanj baenz doengh baen doengh ranzlaeuz moq cungj hwnq hwnjdaeuj lo. Mwngz yawj, gizhaenx lijmiz geij doengh ranzlaeuz cingq caep ne.

Hoeng, mbouj gaeuq gyaeundei couhdwg, geij bi neix daeuj, ndaw mbanj gyoengqvunz cungj okbae lauzngaenz, hwnq ranzlaeuz, cix mbouj aiq goq vanzging veiswngh. Byaij haeuj ndaw mbanj, mwngz couh yawjraen goxgox gexgex cungj dong miz haujlai nyapnyaj, lienz diuzrij ndawde cungj fouz gak cungj gak yiengh nyapnyaj. Gwnz loh loemq miz haujlai gumznaez, boux byaij loh mbwnrengx ndang cungj rim faenz, fwndoek ga rim naez!

Daj bineix seiqnyied doxdaeuj,“baet seuq lanjmbanj, Vujmingz gyaeundei,” aen hozdung hung neix guh daeng lajmbanj, yienghneix, ndaw mbanj gietdingh, mbanj raeuz caezgya baet ranz baet hongh, cingleix ndaw mbanj goxgox gexgex seuq bae. Ngoenzneix doenghhaet daihcaeux, ndaw mbanj gyoengqvunz couh faen baenz geij doih, yungjfoedfoed guh hwnjdaeuj. Mwngz yawj, gizneix gyoengqvunz cungj caezgya dawz sauqbaet sauq, conx dong dawz hwnj gwnz ci bae, yinh bae daengz lahgiz culijcangz, gizhaenx gyoengqvunz cingqcaih dawz diuz guenjraemx cung swiq namhnaez gwnz daihloh! Bouxboux cungjdwg nyaengqfoedfoed. Daeujdaengz diuzroen naeznwdnwd haenx, va, gizneix engqgya nauhyied ha! Geij boux hauxseng cingq dawz fagcanj roengzrengz canj gij rin’iq, dawz gijde dienz roengz gumz bae. Ciuqhong ndeu, daihgya najbyak cungj hanh conh lo, hoeng, cungj mboujmiz saek boux dingz roengzma, raemxhanh daj najbyak rih daengz gwnznaj、gwnz buh……

Gyoengq lwgnyez raeuz hix mbouj youqhoengq. Yawj, raeuz caemh dawz fag gvak iq, fag canj iq cingleix henzroen gij nyangq, caemh mizmbangj ra mbouj raen faggvak caeuq fagcanj, couh aeu fwngz ciemz, roxnaeuz dawz gij nyangq conz baenz dong. Yaepndeu, gwnz fwngz raeuz cungj hwnj baenz aen baenz aen bop iq, hoeng mboujmiz saek boux hemq in. Saek seiz in lai, aeu bak boqboq angj fwngz, youh caiq laebdaeb guh.

Seizgan gvaq ndaej gig vaiq, daengz banngaiz, gwnzroen doenghgij gumznaez mbouj raen lo, henzroen nyapnywj daiq rag cungj ciemz lo, bonjlaiz doenghheij nyapnyaj dauqcawq cungj raen haenx seizneix caemh ndonj deuz liux lo……

Baet seuq lajmbanj, hawj banjranz raeuz engq gyaeundei lo. Gou gyaez mbanjranz gou.

（指导老师：林锦凤 黄成良）