Yaep da siujyoz couh yaek bizyez lo, miz haujlai saeh, gou siengj hwnjdaeuj cungj gamjdaengz raeujrubrub, miz haujlai doengzhag hawj gou ciengxlwenx mbouj rox lumz, roek bi ndawde, dwg gyoengqde bangcoh gou, hawj gou naemjgeiq le diemzsisi.

Miz dah doengzhag he, de caeuq gou gig ndei, moix baez siengj hwnj de, ndaw uk cungj miz faj naj riunyumj he, lwgda mbij dwk, heuj hauyenyen loh okdaeuj, hix ndaej yawjraen lwgda de ndongqliklik, gokbak vid doxhwnj, miz di diuqbeiz hoeng gig coengmingz, de couh dwg Sinj Yenz. De dwg boux hagseng binj yoz cungj ndei ndeu. Lauxsae moix baez daez daengz de, cungj naj loh riu. De caeuq gou miz di saeh he, saeh neix hawj gou ndaej rox hit daengx ciuh. Haenx dwg baez suyoz gaujsi he, lauxsae fat gienj roengzdaeuj le, gou raen gienj gig genjdan, couh sasa sij hwnjdaeuj. Gou swnhleih dap ndaej geij diuz daez, cingq gag angq gag riu, sawqmwh gou daengx bit lo, gou bungz daengz “duzguk” dangj loh he. Baez yawj ngamq lw cib lai faen cung, genjcaz niemhsuenq, baenzlawz ganj cungj mbouj gib, gaej gangj gyaep “duzguk dangj loh” byaij lo. Danghnaeuz yienghneix, gou gaujsi couh gauj mbouj ndei, ranznden Lij daxbuz baeznaengz cungj haenh naeuz gou doegsaw ak, danghnaeuz baez neix gauj mbouj ndei, gou maranz baenz- lawz miznaj raen Lij daxbuz ne? Simgip dangqmaz, gou liuqyawj mbaw gienj Sinj Yenz, o! De guh okdaeuj lo! Gou goq mbouj ndaej baenz lai, sikhaek dawz daezmoeg sij roengz diuzceij bae, gveng hawj de. Seizneix gou sim diuq hwnj diuq roengz, mbouj siengj daengz de cij yawj diuzceij mbat he couh gveng roengz namh bae. Gou gikheiq raixcaix, sim siengj, lienz di neix cungj mbouj bang gou, suenq gijmaz baengzyoux ndei! Seizneix, cujcangj daeuj sou gienj lo, “duzguk dangj loh”haenx gou doeksat hix gyaep mbouj deuz.

Cuengqhag seiz, Sinj Yenz raen gou mbouj leixlangh de, couh hozunq dwk naeuz gou:“Gou mbouj dwg mbouj bang mwngz, dwg lau mwngz gag swhgeij yaeuh swhgeij, gaujsi muzdiz dwg genjniemh aen gaihdon neix dou hag ndaej baenzlawz yiengh, gou siengsaenq lauxsae dwg yaek rox gij cingzcik caen dou, mbouj dwg gij faensoq gyaj.”Gou dingq gij vah de le, hix gamjdaengz swhgeij mbouj deng, cau vunz, mbouj ginggvaq doengh uk,caeuq mbouj guh daez gvaq ityiengh. Yienghneix guh gvenq le, doeklaeng caen mbouj gamj siengj.

Sinj Yenz, gou caensim docih mwngz, dwg mwngz hawj gou rox cau vunz dwg haih swhgeij, yingjyangj gou daengx ciuh, hawj gou roxyiuj. Gou ciengxlwenx cungj mbouj lumzgeiq mwngz cungj doengzhag ndei neix.

(roek nienzgaep Liuz Meiz)