Ciuhgeq Hihlaz bouxcezyozgyah okmingz Suhgwzlahdij youq mwh swhgeij bi’ndwen geq seiz, roxdaengz swhgeij gyaeu mbouj ndaej geijlai nanz lo, couh siengj gaujniemh bouxbangfwngz bingzseiz doiq de cibfaen ndei haenx. De heuh bouxbangfwngz daeuj daengz henz mbonq, naeuz:“Diuz lab gou lw mbouj geijlai lo, mwngz bang gou lingh ra diuz ndeu daeuj laebdaeb diemj roengzbae, mwngz mingzbeg gij eiqsei gou lwi?”

“Mingzbeg lo,”bouxbangfwngz vaiqvet dwk dap naeuz,“aeu dawz gij swhsiengj mwngz ndeindei swnjciep roengzbae……”

“Hoeng,”Suhgwzlahdij menhmenh naeuz,“gou siengj ra boux vunz ceiq maenhndei ndeu daeuj swnjciep roengzbae, boux vunz neix mboujdanh aeu coengmingz, lij aeu miz saenqsim caeuq ceiqheiq……Boux vunz neix cigdaengz ngoenzneix gou caengz raen gvaq, mwngz bang gou ra saek boux ndei mbouj ndei?”

Bouxbangfwngz dapwngq lo, hix sikhaek hwnjdin bae ra lo. De mbouj lau haemzhoj, doenggvaq gak cungj roenloh bae dajdingq vunzcaiz, daiq boux dem boux vunzcaiz daeuj daengz dangqnaj Suhgwzlahdij, hojsik Suhgwzlahdij cungj mbouj muenxeiq. Doek laeng, bouxbangfwngz naengh youq dangqnaj lauxsae, gyangznaek dwk naeuz:“Gou caen doiq mbouj hwnj mwngz lo, hawj mwngz saetmuengh lo.”

Siengj mbouj daengz, Suhgwzlahdij dauqfanj naeuz:“Saetmuengh dwg gou, doiq mbouj hwnj dauqfanj dwg mwngz swhgeij. Boux ceiq maenhndei dwg mwngz swhgeij, mwngz cix itcig saenq mboujndaej gvaq swhgeij……Gizsaed, moix boux vunz cungj dwg maenhndei, cabied cix youq laeng baenzlawz nyinhrox swhgeij、vatgud swhgeij、leihyungh swhgeij……”

Suhgwzlahdij gangj sat doq gatcaw dai bae lo.

Vih mbouj hawj vunzraeuz lumj bouxbangfwngz yienghhaenx, moix boux vunz cungj aeu geiq maenh coenz vah ndeu:“Boux ceiq maenhndei couh dwg mwngz swhgeij!”

(Liz Dasungh)