Veiz Gozcingh gig haenhndei gij cingsaenz Yienh Cingsih gamj daj saehsaed hwnjdin guh sawqniemh gaijgwz haenx. De naeuz: “Aenban lingjdauj yenveij, couh aeu uklingz dwk ciuq gij fuengcim cwngcwz dangj raeuz caeuq gij cingsaenz cijsi baihgwnz, giethab gij saehsaed bonjdieg miz cauhmoq dwk bae guh hong. Gijmaz cungj dwg ciuq buen ciuq dauq, baenzlawz guh ndaej ndei hong? Aen sawqniemh sou neix guh ndaej ndei lai, mo cinj le cix doigvangq. Haeuxgwn demok le, Yienh Cingsih cix ndaej engqgya soengyungz bae mbefat gij doengh- gogai、 hongndoengfaex caeuq hong- doihduz bonjdieg lo, baijok gij ndei bonjfaenh, lai guh gungyen hawj guekgya.”

Bineix, youq fung saenqhoiz Veiz Gozcingh hawj boux suhgi Yenveij Doenglanz Lij Gaihsi haenx ndawde, damz le ceiqdingh gij gviveh mbefat nungzyez gij vwndiz neix. De vixok: “Ciuq Doenglanz bya lai dieg noix, naz engqgya noix dingz cingzgvang neix, youq gij cosih gviveh nungzyez gwnzde, wnggai daegbied aeu gaem ndei suijli. Guh ndei suijli, mboujdanh dwg aen baujcingq youqgaenj nungz- yez ndaej okonj oklai ndeu, caemhcaiq ndaej gaijgez gij vwndiz ciengzgeiz daeuj vunz caeuq doihduz diegbya gwn raemx nanz haenx.” De lij vixok, ciuq Doenglanz bya lai、haujlai diegbya mbouj miz diuzgienh guh suijli dingz saehsaed neix, “gvaqlaeng wnggai miz giva bae guh hong “moegbonj liengzyouz”, lumjnaeuz ndaem maklaeq、makraeq、lwgndae、haeddauz、 maklix daengj. Gij dieg fanzdwg hab ndaem nei, aenaen swnghcanjdui cungj aeu gyoebcomz vunzlai bae ndaem lai di, seyenz caemh ndaej youq naj ranz laeng ranz lingzsing ndaem di. Duidui ndaem, hohhoh ndaem, gvaq lai bi le, cix ndaej souhaeuj ciengzgeiz lo. Gij haeux youz sou ndaej haenx, ndaej hawj seyenz gag bouj yungh, youh ndaej guh gijgueng, caemh ndaej gai hawj guekgya.” Ndaw saenq itcig giengzdiuh aeu ciuq saehsaed bonj- dieg ceiqdingh banhfap, yienghneix bae dazyinx hong nungzyez.

(caengz sat)