Seizneix, moix baez gou yawjraen dendwngh ronghsagsag haenx, couh siengjdaengz bihaenx youq aen siujyoz lajmbanj iq ndeu, youq gyanghaemh, gij rongh labcuk haenx. Yienznaeuz gij rongh de mbouj rongh geijlai, hoeng, de hawj vunz sim raeuj, hawj vunz simhai, hawj gou ciuhvunz nanz lumz.

Cib geij bi gaxgonq, gou ngamq doeg swhconh bizyez, baen bae laj- mbanj aen hagdangz iq ndeu sonsaw, aen hagdangz neix gig gungx gig gox, seizhaenx youh mbouj miz dienh, dang’yienz mbouj miz dendwngh densi lo. Gou yenzlaiz couh gyaez yawj densi, gyaez dingq yinhyoz, hoeng deng baen daengz aen hagdangz yienghneix, gou yienghlawz cungj angq mbouj hwnjdaeuj. Aen simhoengz gou haenx couh lumj aen daengyouzhaeu deng raemxgyoet soen nei, sikhaek laep- cupcup.

Mbouj miz dendwngh, gyang- haemh cijndaej diemj daengyouzhaeu, hoeng seizhaenx couh lienz youzhaeu hix mbouj ndaej caih mwngz cawx, bouxvunz moix ndwen cij ndaej cawx song sam gaen, di youz neix baenzlawz gaeuq yungh ne? Yienghneix gyang- haemh hwnjdangz cijndaej diemj lab lo.

Gou haemh daih’it daengz gyausiz hwnjdangz seiz, youq laj ronghlab monmeujmeuj haenx yawj gobwnj, yawj saw gig dwgrengz. Seizhaenx, ndawsim youh demgya le geij faen nyapnyuk, caen siengj vit bonjsaw bae suzse youq. Hoeng, yawjyawj baihlaj gyoengq hagseng dingq ndaej baenzhaenx nyinhcaen, hoizdap vwndiz baenzhaenx cizgiz, gou youh son roengzbae……

Haemh daihngeih, gou ngamq byaij haeuj dou gyausiz, couh raen giz gyangjdaiz ronghsagsag——roek gaenj lab daengj youq gwnz daiz. Gou geizheih dwk yawj coh gyoengq hagseng, gou rox, youq diegbya gig hoj neix, gyoengq hagseng cungj dwg song boux yungh gaenj lab ndeu, seizneix mbatdog cawx roek gaenj hawj gou, neix doiq gyoengqde daeuj gangj dwg yungh bit “ngaenzhung” ndeu. Gou cam gyoengq hagseng dwg byawz cawx gij lab neix, hoeng, mbouj miz vunz lwnh, cam lai le, banhcangj Lij Gangh cij naeuz: “Lauxsae, mwngz couh gaej cam lo, mwngz dwg dagaenhnganx, cij yungh gaenj lab ndeu baenzlawz baenz, miz roek gaenj laisiuj ndei di.” Gou yawj roek gaenj lab ronghsag gwnz gyangjdaiz, youh yawj gij lab monmeuj baihlaj gyoengq hagseng yungh haenx, gou lwgda mbaeq lo.

Daj haemh haenx hwnj, gyang- haemh hwnjdangz, gwnz gyangjdaiz roek gaenj lab diemj dwk, haemhaemh cungj yienghneix, comzbaenz fuk doz lajmbanj gig daegbied gig ndeiyawj he.

Hoeng, miz haemh ndeu, raen gwnz gyangjdaiz cijmiz haj gaenj lab, gou hix mbouj dawz hwnjsim. Hoeng, daj seizhaenx hwnj, gou fatyienh aen gvilwd ndeu——gwnz gyangjdaiz miz sam haemh, haemhhaemh cungj miz roek gaenj lab, haemh daiseiq cij miz haj gaenj, yienghneix lwnz hop ndeu dauqbae. Neix dwg vihmaz ne? Gou siengj mbouj ok.

Gvaqlaeng, gou youh ciemhciemh fatyienh, ndaw ban boux hagseng Cangh Lieng soqlaiz gig gyaez gangjvah haenx, bienqbaenz mbouj gyaez gangjvah lo. Gou ra de cam dwg mbouj dwg miz maz simsaeh, de hix mbouj gangj.

Hoeng, haet singhgizit ndeu, mbouj raen de daeuj hagdangz. De dwg boux hagseng gaenx hag ndeu, coengzlaiz mbouj deuzhag, ngoenzneix baenzlawz ne? Gou cam banhcangj Lij Gangh, hainduj, Lij Gangh hix mbouj nyienh lwnh, cam lai le de cij naeuz gou nyi. Laxlawz gij lab gwnz gyangjdaiz dwg gyoengq doengzhag cawx hawj gou, daengx ban seiq aen cuj, moix cuj haemh he, moix cuj ngamj miz roek boux vunz, yienghneix moix haemh cungj miz roek gaenj lab, mbouj lai mbouj siuj. Hoeng, duenh seizgan neix, daxmeh Cangh Lieng bingh lo, de mbouj miz ngaenz cawx lab, moix lwnz daengz cuj de couh cij miz haj gaenj lo. Cangh Lieng nyinhnaeuz doiq mbouj- hwnj lauxsae, duenh seizgan neix cij nyapsaebsaeb. Ngoenzgonq dwg ngoenzsinghgiz, de couh bae gwnz ndoi raemj fwnz, siengj gai aeu di ngaenz daeuj cawx lab, hoeng, mbouj siujsim gvad din lo.

Dingq Lij Gangh gangj le, gou raemxda ciuz ngvih lo.

Cuengqhag le, gou bae daengz ranz Cangh Lieng, de dawz cibgeij gaenj lab okdaeuj, naeuz yaek bouj duenh gonq mbouj miz haenx, gou yawj gij lab hoengzfwdfwd haenx, youh yawj diuzga foeg de, gou nyaenx mbouj ndaej raemxda lae roengzdaeuj.

Couh yienghneix, couh baengh gij lab neix, laebdaeb sam bi, daengx ban doengzhag moix aen haggeiz gaujsi, cingzcik cungj baiz youq daengx yangh doengz nienzgaep daih’it.

Gvaq le sam bi, gou diuh bae aen cuhcungh yozyau he sonsaw, gou gig sij mbouj ndaej gyoengq hagseng gou, hoeng, aenvih gunghcoz sihyau, mbouj ndaej mbouj bae lo……

Seizneix cibgeij ngeihcib bi gvaqbae lo, aen hagdangz iq haenx caeux couh doeng dienh lo, gou youh diuh daengz yienhsingz aen yozyau ndeu sonsaw, diuzgen engq ndei lo, ndaw gyausiz mboujdanh miz dendiuz ronghsagsag, lij yungh dennauj hwnjdangz dem. Hoeng, gij ronghlab ndaw siujhagdangz lajmbanj haenx lijdwg itcig youq ndawsim gou ronghsagsag ndongqliklik……

Seizneix gou cungj roxnyinh, yienhsingz ndaw hagdangz ronghsagsag haenx cungj lumj siuj di gijmaz, dwg ha, siuj di gijmaz.

Siengjniemh ronghlab ndaw aen siujhagdangz lajmbanj haenx, ciengx- lwenx siengjniemh……