Gaenh bi daeuj, Nanzningz Si cizgiz gvancez lozsiz guekgya minzcuz yijvwnz gunghcoz cwngcwz fazgveih, nyinhcaen guhhong, doidoengh hong vah saw minzcuz ndaej yamqonj baenaj.

It dwg ok gij vwnzgen gveihfan Vahcuengh Sawcuengh. Bineix 5 nyied, dawz《Nanzningz Si Sawcuengh Sevei Sawjyungh Guenjleix Banhfap》dangguh cwngzfuj mingling fatbouh, daj 7 nyied 1 hauh hwnj cingqsik ciuqguh. Aen banhfap neix dwg gih raeuz daih’it bouh saujsu minzcuz yijyenz vwnzsw gunghcoz cwngfuj gveihcangh.

Ngeih dwg cizgiz damqra Vah- cuengh Sawcuengh byauhcunjva gaujsi. Bi’gvaq 6 nyied, daih’it baez Gvangjsih Vahcuengh Sawcuengh suijbingz gaujsi youz Swcigih Yinz- minz Cwngfuj、Swcigih Minzyijveij nem Nanzningz Si Yinzminz Cwngfuj doengz banh haenx ndaej swnhleih saedhengz. Bineix Vahcuengh Saw- cuengh suijbingz gaujsi yaek youq 12 nyied gawjhengz. Dangqnaj, Nanzningz Si gak aen gaujdenj cingq cugmbaek guh ndei gak hangh hong bwh.

Sam dwg onjbouh doihaeuj“song vah saw”sonhag gunghcoz. Cuengh Gun song vah saw gyauyuz dwg Bouxcuengh daegbied aeu miz haenx, dwg gij neiyungz cungyau ndaw Nanzningz Si minzcuz gyauyuz. Dangqnaj, Nanzningz Si gungh miz Cuengh Gun song vah saw sonhag saedniemh yozyau 28 aen, ndawde siujyoz 21 aen, minzcuz cunghyoz 7 aen.

Seiq dwg ca ndei Vahcuengh gvangjbo yingjsi gunghcoz. Vih yienh’ok gij ndei Vahcuengh, swnj- cienz vwnzva Vahcuengh maenhndei, Vujmingz Yen densidaiz youq bi- gvaq haibo Vahcuengh cezmuz liux caiq mboujduenh caezcienz Vah- cuengh cezmuz neiyungz, Sanglinz Yen dauqfuk haibo Vahcuengh densi sinhvwnz cezmuz cingq gyavaiq doihaeuj.

Haj dwg caezcienz minzcuz yijvwnz gunghcoz gihgou. 2010 nienz, Nanzningz Si dawz minzyijveij laeb- baenz aen fucugiz saehnieb danhvei youz si minzveij guenj haenx, baihndaw laeb 2 aen cinggohgiz gohsiz, dingh bouxbenhci 8 boux. 2013 nienz ndaw si caizcwng anbaiz minzcuz yijvwnz yezvu cienhangh cienzngaenz, vih Nanzningz Si hong vah saw minzcuz ndaej gengangh fazcanj daezhawj cujciz nem cienzngaenz baujcang.

(Veiz Yenzfuz)