Daengx bi seiq geiq, cin hah cou doeng, gou daegbied gyaez seizcou. De lai saek lai yiengh, menhmenh byaij gvaq lajbiengz moix guggex, mbouj guenj dwg youq ndaw doengh、ndaw suenmak, roxnaeuz ndaw ndoeng, gyoengq- vunz cungj raen gij ngaeuz de. De couh lumj fuk veh canghdajveh okmingz veh haenx, nding、 henj、loeg saeksaek cungj miz.

Youq gij saek neix ndawde, ceiq camx da couh dwg saeknding.

Saeknding, gizgiz cungj miz. Haeuj ndaw ndoeng goraeu bae, mwngz yawj, seiq henz cungj ndingfwdfwd, gyoengqde vih angq- coux seizcou daeujdaengz cungj dawz fwngz bek nding lo. Sawqmwh, mbaw raeu he roemx daengz dangqnaj gou, gou song fwngz gop de, sijsaeq yawj dwk. Raq rumz he ci daeuj, de daj ndaw fwngz gou doek roengz namh bae.“Mbaw loenq mbouj dwg huq fouzcingz, vaq baenz namhnaez lij ganq va.” Gou ndaw sim gag danq dwk. Ngiengx gyaeuj yawj mbawraeu, gyoengqde lumj gij mbawfei dawz, youh lumj daengngoenz ngamq swng hwnj, fatok rongh caeuq ndat. Caiq yawjyawj ndaw suenmak, bingzgoj baenz lo, aen’aen nding lumj daengloengz, gyoengq nungzminz bohlungz cingq nyaengq dwk……

Seizcou dwg saekhenj. Yawj, ndaw naz rienghaeux cungj henj lo, baenz benq henjgim, lumj bu fan danj henjgim he hawj gwnzdieg. Gyoengq nungzminz bohlungz cingq sou meg, doq sou doq ciengq go:“Bineix soucingz ha, caen mbouj loek ha……”Seizcou vagut dwg saekhenj, hai angj couhlumj fajnaj lwgnyez riudek haenx; gij dujva yaek hai mbouj hai haenx, najnyaenq dwk…… lumj cingq beij byawz gyaeundei. Gij mbaw gwnz gofaex hix bienq henj lo, de rag dawz hozbuh rumz daxbuz, mbinyagyag.

Seizcou dwg saekceb. Mwngz yawj, aenmbwn cebndongq haenx miz fwjhau biu dwk, couh lumj fan baengzcouz youh gvangq youh hung he. De ingj roengz dah iq, dah iq engqgya sawcingh. Yi, duz bya iq he cingq youq laj mbawfaex guh yahndoj, hwhw, caen manzgyaengq. Gyanghaemh, ndaundeiq dajcang aenmbwn cebyanyan haenx, ndongqliklik, caen gyaeundei!

Seizcou dwg saekloeg. Ndaw suenbyaek byaekbohcai、byaekheu loegyauyau, gij loeg haenx dwk naedhanh boux guhnaz dwk okdaeuj……

Gij saek seizcou lai saek lai yiengh, gou gyaez de simndei, gyaez de soengq fungsou hawj raeuz.

(roek nienzgaep Vangz Cingciuh)