Vunz, cungj rox bienq laux, seiz iq, dou ingbaengh bohmeh, hung le, couh bienqbaenz bohmeh ingbaengh dou. Seizgan lae bae mbouj miz byawz laengz ndaej.

Moix boux bienq laux le, cungj rox lizhai lwg swhgeij, gvanbaz laux gag baema diegcoj de youq. Moix ngoenz moix hwnz, gyoengqde cungj cimyawj aen denvagih, baez youh baez bae bakdou ndwn, ngawzsoebsoeb yawj diuz loh iq ngutngeuj haenx, neix couh dwg bouxlaux muengh lwg lo, muengh ndaej raen le gyoengqde couh gamjdaengz angqyangz、cungsaed.

Bi’ndwen yied laux yied muengh lwg, muengh lwg gaenq baenz vunzlaux moix ngoenz gienh saeh ceiq hung he.

Aen singhgiz neix, sawqmwh siengj daengz dwk dienhvah hawj daxbuz. Dingq daengz gij sing nanz mbouj dingqnyi haenx, daxbuz youq mbiengj dienhvah haenx gikdoengh dangqmaz, sing miz di saenz. “Daxbuz, ngoenz singhgiz dou yaek baema gwncaeuz, mwngz cawj di byaek ndei bw!”“O o, ndei.”Cij song coenz vah, gaenq hawj daxbuz gamjdaengz vuenyungz, byaij loh cungj beij baeznaengz vaiq ne.

Daengz ngoenz singhgiz, daxbuz beij ngoenznaengz hwnq- romh, de nyinhcaen baet ranz, nyinhcaen cawj gij byaek daeglwg caeuq dahlan gyaez gwn haenx, de mbouj raen dwgrengz saek di. Gijneix cungj guh ndei le, daxbuz bae bakdou ndwn caj, caj aen ci gyauzceh hai haeuj diuz loh iq haenx daeuj, gwnz ci miz lwg、 lwgbawx、 dahlan de hwnzngoenz siengjniemh haenx.

Mbatneix, gyoengqde caen dauq lo, daxbuz coux hwnjbae, bang dahlan aemq aen daehsaw naekgywggywg haenx, ndaw bak lij damz gij vah mbouj rox gangj gvaq geijlai baez haenx, sim de angqfaengfaeng dwk.

Gij maqmuengh bouxlaux, couh dwg siengj yawjyawj naj lwg naj lan, muengh gyoengqde gingciengz baema ranz yawjyawj, nanzdauh di neix dou hix guh mbouj daengz ma?

(roek nienzgaep Denz Funggyauh)