Miz ranz vunz he ciengx song duz meuz, duz he gaenx, duz he gik. Song duz meuz neix gingciengz doxceng.

Duz meuzgik bae ciuq hahahging. Meuzgik daeujdaengz dangqnaj hahhahging baez ciuq, raen swhgeij youh hung youh sang. De angq dwk bak mbouj riu ndaeng mbij, gij mumh gij rieng cungj daengjfwfw hwnjdaeuj lo. Couh buengq gen buengq ga byaij ok aen ranz hahhahging, bongh ma ranz. De daekeiq fwdfwd dwk daengz dangqnaj meuzgaenx naeuz:“Gou ciuq hahhahging lo, gou caen hungsang ha.” Meuzgaenx baez dingq riuhaha hwnjdaeuj. Meuzgik mbouj rox mbwn rox namh, youh bae ra duzguk beij dwkgienz. Caengz ok daengz mbat gienz daihsam, meuzgik couh saw satseuq. Meuzgik mbouj fug, youh naeuz:“Duzguk huk, mwngz gamj caeuq gou beij benz faex lwi?”“Beij couh beij!” Duzguk giendingh dwk naeuz.

Meuzgik caeuq duzguk hainduj doxbeij lo. Meuz yaep ndeu couh benz daengz gwn faex, daekeiq faengfaeng dwk yawj duzguk. Duzguk baez got gofaex, yungh rengz baez ngauz, faex laemx lo. Meuzgik doek roengzdaeuj lo. Duzguk youh hingz lo.

Meuzgik mbouj rox baez neix vih maz saw. Youq gwnz loh ma ranz, de youh mbouj rox mbouj nyinh dwk byaij haeuj aen ranz hahhahging, ndwn haeuj dangqnaj aen gingq rox hawj vunz bienq byom he bae, ngiengx gyaeuj baez yawj, swhgeij youh byom youh iq, couh naiqnueknuek byaij ok bakdou ranz hahhahging. De engq ngeizvaeg lo: Hai, gou haxbaenh lij gig hung sang, seizneix baenzlawz bienq ndaej youh iq youh byom ne? Nanzdauh dwg aenvih deng duzguk hoenx? Ma daengz ranz, meuzgik cam meuzgaenx:“Vih gijmaz gou yaep ndeu hung sang yaep ndeu iq byom ne?” Meuzgaenx rag meuzgik daengz dangqnaj aengingq cingqciengz he, heuh de cihgeij ciuqciuq.

Meuzgik seizneix cij fwt roxsingj, rox gij dauhleix de. Sou rox lwi?

(haj nienzgaep Vangz Ginhhuj)