Lwgfaeg hamz miz gak cungj anhgihsonh ndang vunz aeu miz haenx, nyinzsei gijgwn hamzliengh gig sang, gwn de ndaej gyangqdaemq danjgucunz、gyangq hezcij、fuengz baenz doenghmeg giet ndongj, caemhcaiq ndaej leih raemx baiz caep、gemjbiz.

Danhseih lwgfaeg singq caepliengz, cou doeng geiqciet mbouj hab ciengzseiz gwn, hix mbouj hab gwn lai, mboujnex yungzheih rom nit haeuj ndang, doiq aendungx cibfaen mbouj ndei. Vih mienx deng gij nit rom youq ndaw ndang, moix singhgiz gwn lwgfaeg mbouj hab mauhgvaq 3 baez. Danghnaeuz cawj dang gwn, hix mbouj hab gwn lai, moix baez gwn 200 gwz dauqndaw couh ngamj. Doengzseiz vih cunghab gij nit, dajcawj seiz aeu haeujsim dapboiq. Cauj gwn hab caeuq nohvaiz roxnaeuz suenq、hing、yiengzcoeng、daeuhseih boiqliuh caez cauj; aeuq dang cix dwk ndok caeuq hing、coengbieg itheij aeuq; cawj cuk cix hab caeuq lwgmaenz itheij cawj gwn, yienghneix ndaej raeuj dungx.

Linghvaih, aenvih lwgfaeg singq caep, boux bingzseiz miz aendungx heiq nyieg、dungx caep insep aeu siuj gwn, boux baenz bingh nanz caeuq boux gen’ga gyoetgyat yiengz haw geih gwn.