Conhgyah genyi naeuz, bouxlaux lienhndang aeu aenq rengz bae guh, ndaej guh youzbyaij、dwk daigizgenz daengj hozdung. Linghvaih, bouxlaux hix ndaej aeu raemxgyoet daeuj swiq naj, hawj aenndang dingj ndaej nit, siuj baenz cihgi’gvanjyenz caeuq menhsingq cihgi’gvanjyenz.

Haeuj laebcou le gyanghaemh haeujninz aeu haeujsim baujraeuj, aeu vuenh diemx, roxnaeuz aeu gaen bu gwnz diemx baujraeuj. Ninz seiz aeu hoemq denz ndei, fuengz aendungx dwgliengz.

Fuengz baenz fungcaep. Aenvih mbwn bienq liengz, aenhwet deng sonjhaih engq youqgaenj, gij bingh nyuenz mbouj mingzyienj haenx youh hainduj fukfat lo. Riengzdwk mbwn liengz, cunghyih lijlun baihgwnz soj gangj “rumz”、“nit”、“mbaeq” yungzheih ciemq haeuj ndang vunz bae, boux baenz hwet naet hoz naiq、loihfungcaep hoh in daengj couh gamjdaengz engq in lo, ndigah aeu habdangq guh di ietlangh yindung ndeu.

Fuengz baenz binghdasaep. Binghdasaep cujyau dwg song aen lwgda hawq saep、in humz、ndat haenz, youqgaenj seiz gok i biux naeuh caeuq ganjyenj fatyiemz. Danghnaeuz bungz daengz mbwn nit roxnaeuz mbwn hawqsauj, cungj bingh neix couh engq haeuj naek lo.

Ndigah, mwh yungh da gaenj- cieng seiz cim dwk da mbouj yaep, ciengzseiz yaep lwgda ndaej hawj raemxda dumznyinh gok i caeuq biujmienh gezmoz, doengzseiz ndaej dwk di yenjyozsuij ndeu.

Fuengz baenz dungxsiq. Boux ciengzseiz gamjdaengz dungxsaej mbouj cwxcaih、boux baenz dungx- raeng haenx, seizcou ceiq yungzheih baenz dungxsiq. Yawhfuengz cungj bingh neix wnggai lai gwn cijyuj- sonhgin, danhseih mbouj ndaej gwn cijsoemj gyoet.

Seizcou hix dwg aen geiqciet ndei lienhndang ndeu. Hoeng conhgyah nyinhnaeuz, aen geiqciet neix gaej yindung haenq lai, fuengz ok hanh daiq lai. Doiq boux guh yindung daeuj gangj, moix baez lienhndang le wng lai gwn makleiz、lwgraz、dangzrwi、raetngaenz daengj, danghnaeuz ok hanh daiq lai, ndaej habdangq bouj gwn di raemxgyu ndeu.