Ciengzgeiz sawjyungh gij yozvuz yaz- gauh rengz gaj nengz ak, mboujdanh rox hawj gij nengzbingh ndaw conghbak dingj ndaej yw, caemhcaiq youq hanhhaed、miedgaj nengzbingh seiz, hix rox hanhhaed、miedgaj gyoengq nengzbingh cingqciengz ndaw bak, hawj gij “swnghdai doxdaengh” ndaw bak deng buqvaih bae, yinxhwnj baenz binghconghbak moq caeuq ganjyenj moq. Linghvaih, mbangj yozvuz yazgauh ndawde hamz miz swnghvuzgenj caeuq gij doxgaiq swgizsing ak haenx, danghnaeuz ciengzgeiz sawjyungh, mboujdanh sonjhaih nemmuek oiqet de, caemhcaiq lij rox aenvih ciengzgeiz mboujduenh gig de, hawj nohheuj、conghbak、diuzlinx daengj giz fatyiemz cix yinxhwnj baenz nohheuj in、conghbak in、linx in daengj bingh; boux miz gominjsing ae’ngab rox aenvih gij feih deng yozvuz yazgauh daeuj gig cix baenz ae’ngab caeuq dungxsaej mbouj cwxcaih, mbangj yozvuz yazgauh lij hamz miz ywnyumxsaek dem, ciengzgeiz sawjyungh rox uqlah najheuj, hawj diuzheuj ndaemndet mbouj ndei ngonz.

Conhgyah daezsingj naeuz, doiq boux conghbak miz bingh daeuj gangj, ceiq ndei dwg aeu yazgauh hamz fuz caeuq yozvuz yazgauh doxlwnz yungh, gij vunz cungnienz、bouxlaux baenz heujnengz seiqhenz diuzheuj miz bingh haenx, ceiq ndei dwg senj gij yazgauh hamz fuz caeuq gij yazgauh hamz cunghcaujyoz haethaemh dapboiq sawjyungh. Boux diuzheuj bungq gyoet bungq ndat haemq minjganj haenx, ceiq ndei senj yungh gij yazgauh fuengz soemj dingj gominj caeuq itbuen yazgauh hamz fuz daeuj boiqhab yungh.