Haetromh gaeq haen geij sing, aenmbwn yienzbonj lij laepndaem haenx ciemhciemh bienq haubieg lo, couh hau lumj dungxbya, youh lumj nyumx gij yenzliu hau nei. Gonywj iq daj ndaw fangzhwnz loq ndiu gvaqdaeuj, raurumz mbat he, iet mbat nonx he, naed raemxraiz he venj youq gwnz ndang heuoiq heuoiq de. Gijneix cungj fatseng youq ndaw mok gyanghaet moengzloengz. Sawqmwh, geu rongh ndongqgim he dwk byoengq caengz sa neix, daengngoenz okdaeuj lo.

Daengngoenz menhmenh swng hwnjdaeuj, fat ok gij rongh henjnding, geijlai lumj aen gemj dahsau iq najnyaenq haenx ha, daihdeih ciemhciemh ndiu lo, hainduj fat ok cungj heiq rang he, gwnz namh hix menhmenh doengh hwnjdaeuj.

Mbwn baez rongh, ranz riengz ranz daeng rongh hwnjdaeuj, mbouj geij nanz ranzranz conghheuq cungj oenq fefe, gyoengq vunzmbanj cawj ngaizromh lo, daengx aen mbanj hix ndiu lo, haxbaenh gij caemdingh haenx gaenq siusaet mbouj raen lo. Haetromh, dah’iq ciuqyiengh lae dwk mbouj rox baegnaiq, mbouj dingz mbouj duenh ciengq go dwk dinghdingh lae bae daihhaij. Raq rumz liengzsisi he ci gvaq najraemx, najraemx fubfeb lumj gyaepbya nei; ci gvaq gij vadoengh song hamq, gij va haenx henjrwgrwg, bibi buengqbuengq dwk youq ndaw rumzhaet angqyangz diuqfoux; ci gvaq ndoeng faexcuk song hamq, fat ok gij sing yiengjsasa, couh lumj ciengqgo danqhaenh gij rumz haetromh.

Seizneix, haetromh lajmbanj hawj gou haeujmaez.

O! Gou gyaez haetromh laj- mbanj!

(seiq nienzgaep Yangz Yijcwnz)