Vuenyungz dwg gijmaz? Gou daj iq boh ndiep meh gyaez, mbouj bungz gvaq haemzhoj, dauq caen mbouj rox gijmaz dwg vuenyungz; vuenyungz dauqdaej dwg gijmaz? Ngoenzneix bae “Bwzdu” caz cij rox: Vuenyungz dwg cungj roxnyinh he, dwg simmuengh ndaej muenx- cuk le cungj roxnyinh he.

Gizsaed gij vuenyungz gou gig genjdan, daxmeh saeqsim henhoh gou ndiepgyaez gou, gij gyaez daxmeh hawj gou roxnyinh gig muenxcuk, neix couh dwg gij vuenyungz gou.

Couh youq haemhneix caet diemj lai cung, gou fatyienh bien cozvwnz “Vuenyungz” gou mbouj rox sij lo. Daxmeh rox le, cuengq gij hong ndaw fwngz roengz, gwih danci doz gou bae ranz goeng’au he, hawj goeng’au son gou sij bien cozvwnz “Vuenyungz” neix……Gyanghaemh, gwnz roen rumznit ci dwk, hoeng gou mbouj raen nit saekdi, laxlawz dwg daxmeh aeu aenndang iqnyieg de cwdangj gou. Gij gyaez daxmeh couh yienghneix seizseiz guenq haeuj ndang gou daeuj. Daengz ranz goeng’au le, daxmeh dinghdingh naengh youq henz, nyaenx dwk baegnaiq, caj gou, buenx gou……Byonghhwnz laeg lo, daxmeh mbouj raninz saekdi, itcig dingj daengz gou sij sat bien cozvwnz “Vuenyungz”. Youq gwnz loh ma ranz, gou yawj ngaeuzlaeng daxmeh, siengj hwnj baeznaengz haujlai saeh, moix baez cijaeu gou caengz sij sat cozyez, daxmeh cungj buenx gou, caiq haemh cungj buenx. Daxmeh buenx gou couh dwg gij vuenyungz gou.

Daxmeh, miz mwngz, miz mwngz buenx gou majhung hawj gou gig muenxcuk, gig vuenyungz!

Daxmeh, docih mwngz!

(seiq nienzgaep Lij Dwngz- feih)