武鸣县民族中学128班 卢宝麒

Mehgimx gou dwg boux vunz ceiq soh youh haengj bangcoh vunz ndeu. Aenvih mehgimx hozunq, ndigah gij vunzhung、lwgnyez seiqhenz cungj haengj caeuq de gyau baengzyoux.

Bi’gvaq 4 nyied 5 hauh, dwg ngoenz gou ciengxlwenx nanzlumz ndeu, aenvih mehgimx bingzseiz ceiq gyaez gou haenx, youq ngoenzhaenx ciengxlwenx lizhai gyoengqdou lo, de louz hawj gyoengqdou cij miz siengjniemh, hoeng, gyoengqdou doiq de lijmiz haujlai haujlai sijmbouj- ndaej, gij ndei de doiq gyoengqdou haenx lij youq ndaw da dou nyinhdakdak.

Mehgimx gaxgonq doegsaw cingzcik gig ndei, haujlai vunz lumj de cungj nienzgeij yienghneix gaenbonj mboujrox yinghyij danhswz lo, hoeng, mehgimx lij ndaej mbouj dingz mbouj duenh dwk boih ok haujlai yinghyij danhswz, hawj vunz lingh yiengh yawj de, caemh haenh mbouj dingz, ndigah de doiq gij yozsiz gou gig gvensim, caemh gig yenzgwz, bingzseiz cijaeu de baez ndaej hoengq couh daeuj genjcaz gij cozyez gou.

Geiq ndaej miz baez ndeu, gou vihliux ndaej bae caeuq gyoengqdoih guh’angq, couh ganjvaiq guh cozyez. Guh sat le, cungj mbouj genjcaz saek di, couh cuengqcak cozyez, buet ok bakdou bae. Bouxlawz rox baenzlai boihseiz, cingq youq gou yaek yamq ok bakdou seiz, mehgimx daengz lo, de raen gou le, coenz vah daih’it couh cam:“Baujgiz, mwngz sij cozyez sat la? Hawj gou yawjyawj.” Dingq de yienghneix gangj, gou vueng lo, aenvih gou sij ndaej gig lujlaj, caemhcaiq mbouj genjcaz saek mbat, hawj de genjcaz itdingh deng ndaq, ndigah gou ndwn youq bakdou, mboujgamj nod saek yamq. Yawjraen gij saenzcingz gou, mehgimx rox lo, de rag gou daengz henz ndang, vahnaek cingzlaeg dwk gangj:“Mwngz haengj angq, mboujmiz vunz ndaej laengz mwngz, hoeng, mwngz siengjsiengj yawj, bonjfaenh doiq bonjfaenh mbouj fucwz saekdi, doeklaeng dwg yienghlawz, mwngz siengj gvaq lwi?” Gou ngaem gyaeuj roengzdaeuj, fajnaj ndatfoed- foed, mbouj gamj yawj mehgimx, mehgimx youh naeuz:“Mwngz dwg boux vunzsai ndeu, guh gijmaz saeh cungj aeu nyinhcaen fucwz, yiengh- neix daengz ngoenzcog cij ndaej baenz boux vunz mizyungh ndeu.”Gangj sat de ra aen daengq ndeu, hawj gou naengh youq henzndang de, caeuq de itheij genjcaz cozyez. Dang miz diuz daez loek, de couh naihsim dwk son gou, itcig daengz gou lijgaij cij dingz. Mehgimx hawj gou roxdaengz guh gijmaz saeh aeu nyinhcaen doiqdaih, mbouj ndaej lujluj lajlaj.

Mehgimx gig haenh gij cozvwnz gou, hoeng de doiq gou iugouz caemh gig sang, de ciengzciengz naeuz gou nyi, gawqvah gig bingzciengz ndeu, danghnaeuz gya hawj haujlai hingz- yungzswz, yienghhaenx gawqvah mwngz bienq ndaej engqgya sengdoengh、gidij、hingzsieng, youh gojyij ciuyinx vunz, hawj vunz yawj liux bien vwnzcangh mwngz couh miz cungj roxnyinh lumj daengz gvaq giz deihfueng haenx ityiengh. Gou geiq maenh gij coenzvah mehgimx gangj haenx. Mehgimx bingh naek ninz youq gwnz congz lo, vanzlij gingciengz daengq gou naeuz：“Baujgiz, mwngz itdingh aeu gya’gyangz gij suyoz mwngz, gungjgu gij yijvwnz mwngz, mboujndaej lujlaj.” Youq ngoenzgonq mehgimx lizhai dou haenx, de lij rag dawz cik fwngz gou naeuz:“Baujgiz, mwngz aeu roengzrengz doegsaw, gou caemh aeu ganjvaiq ndei hwnjdaeuj, yawj mwngz gauj hwnj dayoz!” Seizneix, cik fwngz mehgimx mbouj caiq lumj gaxgonq yienghhaenx miz rengz lo, hoeng, de hawj gou engq miz rengz, hawj gou mbouj caiq youq daemdengj dangqnaj ngaem gyaeuj.

Moix baez siengj daengz mehgimx, raemxda gou cungj ciemq rim cehda. Miz haemh ndeu, aenvih daiq siengj mehgimx lo, gou siengsim dwk daej ok sing daeuj, daxboh daxmeh byaij gvaqdaeuj naeuz:“Baujgiz, gyoengqraeuz daihgya cungj siengj mehgimx, hoeng, raeuz cungj dawz faenh siengjniemh neix yo youq ndaw sim, vunz baenz seiq cungj aeu ginglig haujlai daemdengj, ndigah raeuz aeu hag rox giengiengz.” Dingq sat gij vah daxboh daxmeh, gou lumjnaeuz majhung haujlai, gou aeu dawz faenh siengjniemh neix vaqbaenz cungj ligliengh he daeuj roengzrengz hagsib, guhbaenz gij simyienh mehgimx.

（指导老师：黄素艳）