黄局长咳嗽

(ciep geiz gonq)

“Mehnax, mehnax, miz hek daeuj, vai di bae cawx di byaek ndei he, dou yaek yet laeuj.” Vangz gizcangj coi mehsimj naeuz.

Mehsimj naeuz：“Ndei, ndei, cawx byaek gijmaz ne?”

“Duz gaeqdoj he, song duzfw、 duzbaeu、duzgungq、 nohyiengz、nohcwz, daeuhfouh, byaekheu……”Vangz gizcangj gaemz heiq ndeu diemj le haujlai byaek, seizneix mbouj raen de ae saek sing, de vad fwngz naeuz：“Seizgan mbouj caeux lo, vaiq bae cawx byaek.”

Mehsimj gipmueng hwnj haw bae, yaep yet couh riuj swxbyaek rim he ma ranz, Vangz gizcangj diemj gij byaek haenx yienghyiengh cungj cawx ndaej caezcienz.

Vangz gizcangj lij dawz bingz laeuj mauzdaiz ndeu okdaeuj gingq Lij gizcangj. Donq haeux neix, song boux gizcangj gwn ndaej gig haisim.

Soengq Lij gizcangj okdou le, mehyah Vangz gizcangj yawj gij byaek ndei gwnzdaiz haenx, naeuz：“Ngoenzlwenz mbouj wnggai yienghhaenx dakdaih Daegrin, de dwg baez daih’it daeuj ranz raeuz bw!”

Vangz gizcangj naeuz：“Yawj, neix couh dwg coenz vah “mehmbwk byoem raez yawj mbouj bae gyae” haenx. Lij gizcangj dwg byawz? Dwg gizcangj, ngoenzlaeng raeuz nanzmienx miz saeh aeu gouz de. Daegrin dwg byawz? Dwg boux guh reihnaz ndeu, gou miz saeh hix gouz mbouj daengz de. Neix couh gvaiq mbouj ndaej gou naek boux mbaeu boux lo!”

Mehyah mwnh dwk……

Bi ndeu gvaqbae le, miz ngoenz ndeu, Vangz gizcangj ciep ndaej dienhvah Daegrin, Daegrin gikdoengh dwk naeuz, ndawmbanj doeng goengloh lo, mbanjmbanj doeng roensuijniz, iu lwgguk ma ranzcoj yawjyawj.

Dwg ha! Daj bohmeh laebdaeb gvaqseiq le, Vangz gizcangj dawz lozyieng ndaw ranzcoj buen daengz ranz ndawsingz, moix daengz ngoenzciet, de ciuq gij fungsug ndawmbanj caeq baeuqyah cojcoeng, de laihnaeuz yienghneix gingq cojcoeng, hix dwg hauqswnh cojcoeng lo, samcib lai bi mbouj dauqma ranzcoj saek baez, de sim onjgywt. Seizneix fwt dingqyi Daegrin gangj ranzcoj doeng goengloh, bienq ndaej gyaeundei, sim de doenghyukyuk lo.

Meh yah naeuz: “Baema ba!”

Yienghneix, Vangz giz- cangj hai ci daiq mehyah ma ranzcoj lo.

Ranzcoj bienq ndaej gyaeundei dahraix, bya heu raemx saw, ranzlaeuz aen daeb aen, diuz lohsuijniz sohswdswd soh haeuj ndaw mbanj bae, Vangz gizcangj haenh mbouj dingz.

Daengx ranz vunz Daegrin ndatcingz dwk dakdaih lwgguk, gwnzdaiz baij rim byaek noh, miz noh gaeqdoj、 duzfw、 duzbaeu、duzgungq、 noh- yiengz、 nohcwz、 daeuhfouh byaekheu，Vangz gizcangj yawjraen le naeuz:“Daegrin ha, baenzlai byaek, gou youq ndwen ndeu cungj gwn mbouj liux. ”

Donq haeux neix yienznaeuz dwg huq ndaw ndoeng noh ndaw haij, hoeng，Vangz gizcangj gwn mbouj ok dwg gijmaz feihdauh, ndawsim lij rox nanzsouh dem.

Gingq laeuj cenj bae cenj dauq geij baez le, song boux guhdoih mwh’iq neix cungj miz di fiz lo, sawqmwh, Vangz gizcangj naeuz：“Gou yaek bae yawjyawj ‘bohmeh’ gou baez ndeu, samcib lai bi mbouj ndaej dajleix aen moh bohmeh gou lo, lau deng duzmax duzcwz caij doemq liux lo, roxnaeuz deng go’haz go’ nywj moek liux.”

Daegrin naeuz：“Nanz ndaej dauqma mbat ndeu, bae yawjyawj ba.”

Vangz gizcangj byaij roen yamq vang yamq ved, mehyah cijndei rex de byaij roen.

Daeuj daengz gizdieg moh bohmeh, cij raen aenmoh namh mojmutmut, mbouj raen miz cwz max caij doemq, seiqcawq seuqsaksak, mbouj miz saek go’haz go’nywj moek, Vangz gizcangj song gvan- baz geizheih dangqmaz.

Raen daengz neix, Vangz gizcangj ndawsim gig vuenheij.

Seizneix miz goenggeq ndeu byaij coh henz moh daeuj, de naeuz: “Dwg lwgguk ha? Haujlai nanz mbouj raen mwngz bw. Daeuj yawj ‘bohmeh’ ha. Moix bi ciet sam nyied sam, Daegrin cungj bang mwngz dajleix song doengj moh neix, fwet nywj, dienz namh, caeqgingq, yienghyiengh cungj guh, lumj gingq bohmeh de nei.”

Vangz gizcangj dingq le, ngaem gyaeuj daej hwnjdaeuj, lij song fwngz gag fak aennaj swhgeij dem. Goenggeq raen le doeksaet dwk cam neix dwg vihmaz.

Mehyah Vangz gizcangj gipmuengz gejnaeuz: “De laeuj fiz lo……”（sat）