Youq seiznyez gou, miz saeh angq, miz saeh nanzgvaq, dangyienz hix noix mbouj ndaej saeh nyapnyuk, ceiq hawj gou nyapnyuk couh dwg daxmeh mboen lai, mboen mbouj sat mbouj liux.

Meh gou daj haet mboen daengz haemh: Gyanghaet, daxmeh naeuz:“Vaiqdi hwnq mbonq, gaej caezdaengz lo, caezdaengz rox deng hagdangz haicawz bw……” Bae hagdangz seiz, youh mboen roix he:“Youq gwnz loh aeu siujsim, haeujsim yawj ci, hwnjdangz ndeindei dingq gangj, gaenx hoizdap vwndiz……”Gou mbouj naihfanz dwk naeuz:“Rox lo rox lo.”

Gij mboenraemh neix ngoenz- ngoenz ityiengh. Miz baez ndeu, gou sij sat cozyez, haeuj rug bae ninz. Daxmeh raen henz daehsaw miz dab saw yijvwnz、 suyoz、yinghyij he, couh cang haeuj daehsaw bae hawj gou, lij damzbedbed dwk naeuz:“Hinhhinh mwngz caen simco, lienz saw cungj mbouj daiq.” Gou hix mbouj rox dwg baenzlawz yiengh, couh mbouj cam cingcuj. Gyanghaet daeujdaengz hagdangz, dawz saw okdaeuj couh hainduj doeghaet, seizneix cij fatyienh mbouj deng, 《Budazlahgungh》, gou doeksaet yat, baez fan daehsaw, fatyienh suyoz caeuq yinghyij cungj dwg saw geiz gonq, gou siengj hwnj gij saeh haemhlwenz, nanzdauh dwg daxmeh mbouj yawj cingcuj couh cang haeuj daeh bae? Haengjdingh dwg!

Daxmeh simco gou ha, youh simndei guh saehvaih lo.

Banringz ma ranz, daxmeh daek- eiqfoedfoed dwk naeuz:“Haemhlwenz mwngz lienz saw cungj mbouj daiq, mboujmiz gou ne, mwngz couh……”Gou naeuz daxmeh:“Meh, mwngz couh gaej daekeiq lo, mwngz cang gij saw geiz gonq hawj gou, lij ndei eiqsei daekeiq dem!”“Gijmaz, sam bonj saw haenx cungj dwg saw geiz gonq ha? Cungj gvaiq meh mbouj yawj cingcuj, lij mboen mwngz dem!”

Daxmeh gou mboujlwnh saeh hung saeh iq, cungj mboenraemh mbouj dingz, seizlawz de naengz gaij gij mboen hawj gou nyapnyuk neix ha.

(haj nienzgaep Liuz Hinh)