Ciengz fwnraq haenx ngamq- ngamq gvaq, ciep dwk youh doek fwn iq, ndaw gumzraemx caenx rim gij raemxnoengz haenx. Gou daeujdaengz bakdou, raq hoeng- heiq singjsien he couh bongj haeuj naj daeuj, doengzseiz lij miz geij naed fwn manzgyaengq cup naj gou, mbat neix hawj gou cingsingj haujlai. Gou dauq ndaw rug youh hainduj sij cozyez.

Gvaq yaepndeu, gou ngiengx gyaeuj yawjraen rog cueng miz mbungqmbaj mbinfaengfaeng, miz saeknding、saekhenj、saekhau、saekceb…… Yawj! Miz duz he lij duh youq gwnz vaswjveih aeu diengz ne! De dawz song gaiq fwed hab youq itheij, lumj baenz lumzgeiq daengx aen seiqgyaiq. Vaiq yawj, gij mbungqmbaj diuqfoux yedyed haenx, lumj baenz gyoengq saulengj diuqfoux, gou gaijvaiq okbae siengj dongx gyoengqde, gyoengqde raen fwt miz vunz daengz, ging dwk duz riengz duz mbin byaij lo.

Daeuj daengz bakdou, fwn dingz lo. Gou yawjraen suenbyaek daxmeh. Ragmbouq gaenq loh’ok naj namh lo, gyoengq duhgak lumj goeng vunzgik gwn laeuj fiz nei, baenz boux baenz boux ninz youq gwnznamh. Gyoengq roeg “cici caca” heuh dwk, lumj cingq ciengq gij go ndeidingq haenx, gag maez gag mwnh. Raq rumz he ci daeuj, mbawliux hix youq ndaw rumz fouxyegyeg, yienzhaeuh menhmenh loenq roengz gwnz gyaeuj gou daeuj, dawz gou daj ndaw simmaez dwk ndiu.

Menhmenh dwk, daengngoenz okdaeuj lo. Mbawduhgak youq laj ndit yienjndaej baenzhaenx oiq, couh lumj gij nyawh heuloeg heuloeg haenx. Seizneix ndit gaenq mbouj lumj haxbaenh baenzneix unqnem, rumzhwngq ci haeuj naj daeuj hawj vunz gikgyadgyad, lumj dwg “duzraeujninz” he youq henz rwz mwngz sing unq dwk naeuz:“Ninz ba! Ninz ba!”Gou gyaez seizhah gij gyaeundei neix, engq gyaez seizfwn doek fwnraq gvaq le gij cien bienq fanh vaq、lai saek lai yiengh haenx.

(seiq nienzgaep Ya Yij)