Bihaenx seizhah, de daiq dou youq ndaw hagdangz yawj funggingj. Dou gig dingqvah, lauxsaed dwk gaen riengz laeng de. Lij lauxsae gig vuenheij, raen gijmaz va gyaeundei couh buet gvaqbae, fwngz he ce dauq baihlaeng, fwngz he daix dujva, aeu ndaeng dep gyawj bae mup, couh lumj yaek dawz gij varang mup roengz dungx ityiengh, laep da dwk, gij byoem de daj baihlaeng duiq daengz dangqnaj cw song mbiengj gemj de, mup sat le ndwj da hung, “feihdauh gig ndei nw!”Yienzhaeuh vuenyungz dwk riu ok sing daeuj, “hihi”. De riu le gij heuj haubieg de daj ndaw naengbak ndingmaeq loh okdaeuj, da haep hwnjdaeuj, bwnda miz di doengh. Mwhhaenx dou raen yienghneix, couh rox naj loq hoengz. Va hoengz nywj heu, gingjceih gyaeundei, dahsau daenj vunjhau he, ngoemj ndang bae caemz va, lij fat ok sing riu lumj sing ngaenzlingz nei. Vunz caeuq gingj hab baenz fuk doz gyaeundei he.

Doeklaeng, yaenqsiengq ceiq laeg dwk baez doxdax yenjgyangj he. Gou daibyauj bangaep camgya doxdax. Lij lauxsae guh cijdauj.Lienh le geij aen singhgiz, gou byauj hwnj aen daiz doxdax. Gou siengj gou daengx ciuh mbouj rox lumj de youq laj daiz riunyumnyum yawj gou gij yiengh haenx lo. Lij lauxsae riunyumj,lwgda ndongqlik lumj raemxmboq, mbouj, wngdang dwg lumj ronghndwen. Gou gamj- daengz, gou gaem mwzgwzfungh simdingh dangqmaz, gangj daengz cih doeksat, sing dop fwngz goksatsat nyoengx gou roengz daiz daeuj, hoeng gou lij maez youq ndaw “ronghndwen”. Cig daengz Lij lauxsae angq dwk bekbek gyaeuj gou, unqswnh dwk naeuz“caen mbouj loek” gou cij ndiu gvaqdaeuj.

Doeklaeng, de byaij lo, lwgda haep baenz lumj aen ronghndwen gozngeungeu, fajnaj riunyumj de bae lingh aen singz he.

Lij lauxsae gij riu lumj ronghndwen haenx, gaek youq ndawsim dou, gij riu de buenx dou sam bi, daiqlingx dou sam bi, gyaez dou sam bi. Gij riu caezgya cungj gingqgyaez haenx, vaq baenz aen gangjvanh raeujrub he, venj youq bangx aek ndatoq baihswix dou.

Lij lauxsae, gou siengj mwngz lo.

(seiq nienzgaep Vangz Hau)