9 nyied co, dou daengz Gungh- cwngz Yauzcuz Swciyen Lizmuz Cin Sanggvan Cunh Mbanjliuzgyahvanh 8 Cuj ranz boux ciengx nonsei Liuz Yenzyinh yawj cam. Lauj Liuz lwnh dou de ciengx song bi nonsei, bineix 1 daengz 6 nyied couh gai ndaej 13000 maenz.

Liuz Yenzyinh bineix 48 bi, dahlwg de youq rog guhhong, de caeuq baz guhdoih youq. Ciuq cam rox, aenvih aeu cungj hingzsik gunghswh gya nungzhoh haenx daeuj ciengx nonsei, youz doenghboux gisuzyenz ndaw Gunghcwngz Gaijfungh Nonsei Canjyez Youjhan Gunghswh haenx cijdauj, bi daih’it couh ciengx 10 buek, gig vaiq dwk gaemmaenh gisuz, fawh rawz hab guh maz, de cungj ciuq iugouz nyinhcaen guh. Ndigah, seizneix moix ciengx buek nonsei he, de boux he couh bau liux.

Dou cam de yienghneix guh dwg mbouj dwgrengz? De riu naeuz：“Lai gvaqsuenq gvaq ciengx mou、ciengx yiengz, moix buek laisiuj cungj aeu 15 ngoenz couh baenz sou lo. Yah gou coengh dem, hix mbouj fwengx. Giz ceiq dij couhdwg ciengx nonsei mbouj rab, mbouj haeu, haex nonsei dwg doenghyiengh baujgen, youh ndaej guh bwnh ndei.”

Ciuq cam rox, Sanggvan Cunh Mbanjliuzgyahvanh dwg Gunghcwngz dangqnaj“aen mbanj ciengx nonsei daih’it”, daengx mbanj miz 500 lai moux suensangh, dieg neix 100 lai hoh nungzminz dawz ciengx nonsei dang- guh cungj fuyez moq he. Dou seihbienh cam yawj le geij ranz ciengx nonsei, couh raen bineix seizcou nonsei maj ndaej gig ndei. Caiq gvaq geij ngoenz, Mbanjliuzgyahvanh 100 lai ranz ciengx nonsei haenx couh ndaej gai reh lo, gai hawj gunghswh moix goenggaen 38 maenz, neix couh coj ndaej sou lai.

(Cwng Ciminj Moz Cenzgvangh)