Daih’it Baijok

Vwnzva Bouxcuengh Haidou Lo

10 nyied 9 hauh, Bwzswz Si aen gvanj daih’it aeu baijok vwnz- va Bouxcuengh guhcawj——aen gvanj baijok vwnzva Bouxcuengh youq Denzyangz Yen gizdieg fathwnj goengcoj Bouxcuengh haenx hai dou hawj vunzlai yawjngonz lo.

“Dou hwnjguh aen gvanj baijok vwnzva Bouxcuengh, couhdwg vihliux hai aen cueng hawj vunz- biengz roxnaj vwnzva Bouxcuengh, laebhwnj aen bingzdaiz he baijok vwnzva Bouxcuengh.”Denzyangz Yen Cwngfuj doenghboux fucwz lwnh, vih gaijbienq ndawbiengz Bouxcuengh gij cingzgvang vwnzva conzdungj bienq noix、doenghgij dinfwngz ndawbiengz saetcienz、doenghgij doenghyiengh vunz laebguh haenx mbouj caiq miz, hawj vwnzva Bouxcuengh maenhndei haenx caiq hoengh hwnjdaeuj, Denzyangz Yen laebhwnj le aen gvanj baijok vwnzva Bouxcuengh.

“Seizneix mizmbangj bouxcoz nyinhnaeuz vwnzva minzcuz conz- dungj gvaqseiz lo, mbouj naemj bae roxyiuj, langh mbouj aeu cosih daeuj henhoh, daengz coglaeng doenghgij vwnzmingz Bouxcuengh raeuz cij- ndaej bienqbaenz gij goj riuz lo.”Cingq youq ndaw gvanj ngonzyawj seizhaenx, goenggeq Bouxcuengh heuhguh Vangz Luz 62 bi haenx danqheiq naeuz, dangqnaj youq ndawsingz mbouj daih raen gij ranz Bouxcuengh, bouxcoz Bouxcuengh hix mbouj daih gangj Vahcuengh lo, langh miz gij doenghyiengh lumj gvanj vwnzva miz daegsaek Bouxcuengh haenx guh gizdieg baijok roxnaeuz swnjcienz vwnzva Bouxcuengh, hix dwg gienh saeh ndei he.

(Lingz Cungh)