Seizcou habdangq gwn cuk, ndaej huz dungx cangq mamx, nyinh bwt seng raemx, ciengx yaem siu sauj. Mwh cawj cuk seiz, habdangq dwk makleiz、lauxbaeg、lwgraz daengj, daej ik bwt nyinh sauj.

1、Cuk makleiz: Aeu 2 aen makleiz, swiq seuq le lienz naeng daiq ngveih cab soiq, gya 100 gwz haeuxsuen dwk raemx cawj cuk gwn. Makleiz ndaej nyinh sauj.

2、Cuk maklaeq: Aeu 50 gwz maklaeq、100 gwz haeuxsuen gya raemx cawj baenz cuk gwn. Aenvih maklaeq ndaej ciengx dungx cangq mamx、bouj mak nyangq nyinz、vued lwed dingz lwed, daegbied hab bouxlaux hwet in ga naet、hoh in daengj gwn.

3、Cuk lwgraz: Aeu 50 gwz lwgraz、100 ngwz haeuxsuen, sien cauj lwgraz cug ngenz mienz, caj cuk cug le gyaux mba lwgraz roengz. Hab boux baenz haexgaz、boux bwt sauj baenzae、boux gyaeuj ngunh da raiz gwn.

4、Cuk lauxbaeg nding: Dwk youz cauj lauxbaegnding, 100 gwz haeuxsuen gya raemx cawj cuk. Aenvih ndaw lauxbaeg nding hamz miz huzlozbuzsu, aen ndang bouxvunz supsou le ndaej cienjvaq baenz veizswnghsu A, hab boux baenz naengnoh hawqsauj、boux naengbak dekleg gwn.

5、Cuk cagut: Aeu 60 gwz vagut, 100 gwz haeuxsuen. Sien dwk raemx baek vagut aeu raemx le caiq dwk haeuxsuen roengz raemx vagut bae cawj cuk gwn. Doiq boux seizcou baenz rumz ndat dwgliengz、sim fanz hoz sauj、da hoengz foeg in miz haemq ndei ceihyw cozyung, doengzseiz doiq bingh sim sailwed hix miz haemq ndei fuengzceih cozyung.