Caz lauxbaeg: Aeu 100 gwz lauxbaeg hau, 5 gwz mbawcaz, dwk di gyu ndeu, sien swiq lauxbaeg seuq ronq baenz gep cawj naemz, dwk di gyu ndeu diuzfeih gaej dwk veicingh, cimq mbawcaz 5 faen cung le ndingq roengz raemx lauxbaeg bae heuz gwn, ngoenz song baez, ndaej siu ndat vaq myaiz、leix heiq sek dungx, hab yungh daeuj yw baenzae myaiz lai、dungx ciengq mbouj haengj gwn doxgaiq. Lauxbaeg hau yingzyangj lai, hamz miz gai caemhcaiq baenz yw, ndaej siu ndat vaq myaiz, boiq caz gwn ndaej siu bwt ndat、vaq myaiz caep, dwk di gyu ndeu gwn gawq ndaej diuzfeih, youh ndaej cing bwt siu in.

Caz mbaw gosijsu: Hingndip、mbaw gosijsu gak 3 gwz, hingndip ronq baenz sei, swiq mbaw gosijsu seuq，cimq raemxgoenj 10 faen cung le dang caz gwn, hab boux deng rumznit dwgliengz、boux gyaeuj in fatndat roxnaeuz boux rub myaiz、rueg ok、dungx in aek ciengq daengj dungxsaej mbouj cwxcaih baenz dwgliengz gwn.

Caz raetngaenz: Aeu 20 gwz raetngaenz、5 gwz mbawcaz、20 gwz dangznae. Sien swiq raetngaenz seuq dwk raemx caeuq dangznae aeuq cug; caiq cimq mbawcaz 5 faen cung le raenz aeu raemx de heuz dang raetngaenz yinz gwn. Ndaej nyinh yaem gyangq huj、nyinh bwt dingz ae, hab yungh daeuj yw boux baenz yaem haw baenzae. Raetngaenz dwg gij huq nyinh bouj gwn yw song yungh, ndawde hamz miz danbwzciz daih’iek 10%、vuzgihyenz 4%; lij hamz miz veizswnghsu E caeuq linz、diet、gai、meij、gyaz、naz daengj doxgaiq dem. Gij yw yungh de dwg nyinh yaem nyinh bwt caeuq ciengx dungx seng raemx. Raetngaenz boiq dangznae gwn ndaej bangbouj nyinh ciengx nyinh bwt、dingz ae vaq myaiz.