Seizcou, vunzraeuz ciengz- ciengz gamjdaengz bak、ndaeng、naengnoh hawqsauj, ndigah, aeu lai gwn di gijgwn seng raemx、ciengx yaem dumznyinh ndeu, siuj gwn gijgwn ciencaq、manhget. Gijgwn hab seizcou gwn haenx miz:

Beghab. Ndaej bouj bwt nyinh bwt、cing sim an saenz、siucawz naetnaiq caeuq nyinh sauj dingz ae.

Maenzcienz. Mboujlwnh sai- mbwk lauxnomj、miz bingh fouz bingh、ndang ndei ndang nyieg cungj hab gwn.

Ngaeux. Ngaeux ndip ndaej siu ndat seng raemx gaij hozhawq, ngaeux cug ndaej cangq mamx sek dungx ik lwed.

Byalae. Haeuj cou gwn byalae, mboujdanh ndaej bouj ndang, hix ndaej diuzcez hezdangz ndang vunz, cien gwn、aeuq gwn roxnaeuz cawj cuk gwn cungj ndaej.

Maklaeq. Ndaej cangq mamx ciengx dungx、 bouj mak cangq ndok.

Duhdoem. Aeu duhdoem naed ngenz mienz heuz dangbyaek gwn roxnaeuz dwk raemx baek gwn, mbouj hab cauj gwn.

Makcauj nding. Ndaej nyinh yaem nyinh sauj、ik bwt bouj heiq, danghnaeuz caeuq raetngaenz、beghab、maenzcienz caez aeuq gwn, yaugoj engq ndei.