Goulau mwngz caengz haeujsim dingq gvaq sing fwn, hoeng, cijaeu mwngz sijsaeq dingq, couh rox fatyienh fwn gig gyaeundei.

Fwn seizcin, doekcoco, couh lumj souj go unqrwenz he, hawj vunz simsangj. De baez daeujdaengz, sawj gwnzdieg cienfanh doenghgo doihduz cungj ndiu lo, de baez vad genbuh, giz de vad gvaq haenx cungj bienq loeg lo. De dwkraemx hawj diegnamh, dwkraemx hawj lajbiengz cien loh fanh yiengh, hix hawj ndaw sim gyoengqvunz nyinhsubsub, heuloeg caeuq maqmuengh, cingq youq gak giz gak dieg ditfat.

Fwn seizhah, doekfafa, lumj gij sing hoenx gyong, hawj vunz sim baez saenz baez saenz. De couh lumj bang lajbiengz guhsaeg neix, bang gwnzdieg gij doxgaiq cungj “swiq” baez ndang ndeu, cung gij faenzuq bae, hawj daengx biengz moqsaksak. De daeuj gig vaiq, bae hix gig vaiq, daiq bae gij hwngq seizhah, soengq liengzsangj hawj gyoengqvunz. Loegheu, seizneix bienq ndaej engq loeg engq heu.

Fwn seizcou, doekcaca, couh lumj souj go mboujmiz cih saw he. De daeuj le, doenghreih doenghnaz cungj fungsou lo. De lumj dahsau he, giz neix diuq song mbat, gizhaenx diuq song mbat——fwn yaep he doek hung, yaep he doek iq. De dawz seizhah geu hwngq ceiq doeksat haenx daiq byaij, soengq liengzsisi daeuj hawj gyoengqvunz. Saekhenj, caegcaeg daj ndaw fwn daeuj, de dwg daiq fungsou daeuj, daiq maqmuengh daeuj.

Fwn seizdoeng, doeksese, lumj gij singyaem ndeidingq. Ndaw seizdoeng, de gig noix daeuj, sawj de yienj ndaej gig saenzmaed. De daeuj le, nae hix daeuj riengz de, cw hoemq gwnzdieg. Saekhau, couh baij youq dangqnaj.

Biengz raeuz caen geizmiuh ha, caux ok haujlai singyaem ndeidingq hawj vunz maez. Fwn cijdwg ndawde cungj ndeu. Dingq! Sing fwn baenz raq baenz raq……

(roek nienzgaep Cwng Han)