Geij ngoenz gonq, daxmeh hawj gou 10 maenz ngaenz bae cawx bau gyu ndeu.

Bae daengz sanghden, ndawde miz haujlai vunz cingq cawx doxgaiq, gou siengj: Doxgaiq ndaw diemq itdingh gig ndei. Baenzneix, gou couh genj aeu bau gyu ndeu, doiq lauxbanj naeuz:“Gou cawx bau gyu neix.” Lauxbanj riuhihi naeuz:“Maenz ndeu.” Gou dawz 10 maenz ngaenz ndenq hawj de, de cauj dauq 9 maenz hawj gou. Youq gwnz loh maranz, gou mizdi hozhawq lo, couh dawz 5 maenz ngaenz okdaeuj cawx diuz sietdiuz he. Boux gai sietdiuz ciep aeu ngaenz baez yawj, naeuz:“Neix dwg mbaw ngaenzgyaj ndeu.”Gou mbouj saenq de, ciep gvaqdaeuj menhmenh cazyawj, cix faen mbouj ok dwg caen naeuz gyaj.

Gou youh byaij dauq daengz aen diemq haenx, siengj heuh lauxbanj vuenh mbaw ngaenzcaen dauqdaeuj, hoeng lauxbanj hozndat lo, de naeuz:“Mbaw ngaenz neix mbouj itdingh dwg gou cauj hawj mwngz ba!” Gou gig hozgaek, hoeng cix mbouj rox yawz guh ndei, cijndei ngoemxngwd dauqranz lo.

Dauq daengz ranz, gou dawz gienh saeh neix lwnh hawj daxboh nyi, daxboh dingq le hix gig hozndat. De doiq gou naeuz:“Gvaqlaeng mwngz wnggai hag rox cazyawj ngaenzcaen ngaenzgyaj lo!” Daxboh daj ndaw daeh mbon ok mbaw ngaenzcaen ndeu caeuq mbaw ngaenzgyaj he hawj gou faenbienh. Gou sijsaeq faenbienh mbat ndeu le, fatyienh ngaenzcaen cihsaw cingcuj, ngaenzgyaj cix cihsaw myoxmbad; ngaenzcaen naj ceij ngaeuzwenj, dawz youq gwnz fwngz baez saenq, dingq ndaejnyi yiengjsasa; ngaenzgyaj cix unqnemnem, saenq de seiz mboujmiz sing yiengj.

Hag ndaej dauq bonjlingx neix le, gou mbouj lau caiq haeujhongx lo. Danghnaeuz caiq bungz daengz gij saeh gwnzneix, gou itdingh caeuq bouxcawjdiemq doxbuek mbat ndeu, heuh de mbouj wnggai caiq ngaek vunz lo.

(Cangh Yavaz)