Lungzswng Gak Cuz Swciyen soqlaiz ndaej vunz heuhguh dieg “ fanh bya hopngomx, haj raemx baen lae”, deihseiq de baihdoeng、baihnamz、baihbaek sang, baihsae daemq. Gij raemx saw bya sang neix sawj funghgingj Lungswng gyaeundei lumj fukveh. Dieg funghgingj ceiq gyaeundei suenq dwg nazmbaeklae de. Seizneix, fanh moux nazmbaeklae ndawde gohaeux cingq baenzsou. Gohaeux henjrwgrwg nanwtnwt haenx ei mbaeklae hwnjbae, dawz gaiq nazmbaeklae hoemq ndaej maedmaed saedsaed, yawj gizgyae bae, gohaeux henjrwg mbaek ciep mbaek, caengz dem caengz, lumj diuz mbaeklae dawz gwnzmbwn caeuq lajdeih doxlienz hwnjdaeuj nei, gyaeundei raixcaix.

（Siz Nungzbingh）