□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh nyinhnaeuz, Guengjsae vanzcienz miz hojnaengz ndaej baenz aen dieggoek doenghgogai youqgaenj guek raeuz ndeu. Doengz- seiz, de caemh saenciet gamjdaengz, gij diuzgienh Guengjsae mbefat haeuxgwn haenx lai yaez di. Gaxgonq de mbouj cij gangj gvaq baez ndeu, Guengjsae diegbingz saeq, dieggeng noix, daih dingzlai namh vanzlij dwg namhnding namhbyom, caiq gya hwnj gak dieg doek fwn mbouj bingzyaenz, gij goekdaej suijli yaez, ciengzciengz bungq dengz cairengx cairaemxrongz, sojmiz gijneix cungj hawj ndaem haeuxnaz deng hanh.

Caeuq gij diuzgienh swhyenz Guengjsae doxngamj, gij beijnaek haeuxgwn daengx swngj caeuq lai cungj ginghyingz gaijfang gaxgonq haenx, gihbwnj dwg buenq doiq buenq. Ciuq gij gyonjgeiq gai ok guek bi 1933 daengz bi 1942 haenx, gij huq ndoengfaex ok haenx caeuq gij huq doihduz couh ciemq bae gij cungjsoq gai ok guek Guengjsae haenx 64%. Hoeng haeuxgwn ne, bibi cungj aeu cawx mbangj haeuj guek caeuq daj swngj nden cawx mbangj, cij ndaej veizciz gij suijbingz yungh haeux ceiq daemq vunzlai.

Veiz Gozcingh ngeixdauq gij lizsij gaijfang gvaqdaeuj haenx, naeuz: “Geij bi neix daeuj, raeuz sonyinx hong nungzyez duetliz liux gij saehsaed Guengjsae.”

Geij boux suhgi dangjveij swcigih wnq caemh gig miz doengzgamj.

Vuj Cinnanz faenguenj gvaq nungzyez, de naeuz: “Geij bi neix daeuj raeuz mbouj ndaej ciuq gij cingzgvang gak dieg mbouj doengz haenx ceidingh banhfap, bienqmienh gaem haeuxgwn, yawjsiuj le lai cungj ginghyingz, gijneix hawj gij yaez Guengjsae ndaej oknaj, gij ndei Guengjsae deng ndoj deuz lo.”

Boux Cinz Yinggih youq diegbya majlaux haenx naeuz: “Youq diegbya raemj faex coemh ndoeng daeuj ndaem haeuxgwn, vunzlai naeuz dwg bi ndeu biz, song bi byom, sam bi ndaej raen rin. Dingz guhfap neix cauhbaenz namhraemx laesaet, buqvaih le swngh- dai doxbingz, saet lai ndaej siuj.”

(caengz sat)