(ciep geiz gonq)

Mbwk: Goging byauhfwt mwngz dang aeu,

Youz de baenz gaeu rox nanz yuengq;

Bouxsai mbeilaux rumz fwj cuengq,

Nuengx bang mwngz duengh daengz ndaw fwngz.

Dahsau gyaeundei youq henz liengh,

Mbauqndei dang ngiengx naj bae gaeuj(yawj),

Goging byauhfwt mwngz dang aeu,

Youz de baenz gaeu rox nanz yuengq.

Maamq miz damj dwk ndaej nyaen,

Lwgcoz cingsaenz mbouj bei(bi) buengq;）

Bouxsai mbeilaux rumz fwj cuengq,

Nuengx bang mwngz duengh daengz ndaw fwngz.

Sai: Mwngz nuengx lauxsaed simsaeh ndei,

Nyaenx gou cix ei mwngz coenzvah;

Hojsik gou dwg boux vunzbax,

Gwnz ranz gaiqvax yax lij mbang.

Goging guh liu raeuz cungj maengx,

Faexraeu guh daengq duj vuenheij;

Mwngz nuengx lauxsaed simsaeh ndei,

Nyaenx gou cix ei mwngz coenzvah.

Ranzcauq byaeu feiz liu rangh mbaw,

Aenndoeng baihndaw saeq youh cax;

Hojsik gou dwg boux vunzbax,

Gwnz ranz gaiqvax yax lij mbang.

Mbwk: Mbouj byawz ciengx daeuj couh baenzndei,

Fouqmiz mbouj leiz(liz) song fwngz gaenx;

Raeuz byaeu yiuzvax aeu feiz haenq,

Hawj loz vax haenx coih ranz mwngz.

Ndaw ndoeng faex siuj cix ndaem faex,

Dem bouj seizneix ngoenzlaeng meiz (miz);

Mbouj byawz ciengx daeuj couh baenzndei,

Fouqmiz mbouj leiz song fwngz gaenx.

Byaeu vax liu siuj aeu haz byaeu,

Cawjeiq youq raeuz dawz guh maenh;

Raeuz byaeu yiuzvax aeu feiz haenq,

Hawj loz vax haenx coih ranz mwngz.

Sai: Mwngz nuengx gangj vah dauhleix baenz,

Cagceux duengh haen de cix ngangq;

Maxngawz ndaej nuengx faexbien bangx,

Yamq ndeu couh langh bae leix roen.

Bitboux raen meh (bitmeh) de cix dongx,

Yaek daengz ranz rongh gaeq cix haen;

Mwngz nuengx gangj vah dauhleix baenz,

Cagceux duengh haen de cix ngangq.

Gou boux vunzhuk ndaej nuengx bang,

Goeng rengz lajndang lumj duzcangx(ciengh);

Maxngawz ndaej nuengx faexbien bangx,

Yamq ndeu couh langh bae leix roen.

Mbwk: Mwngz go bouxvunz singqcingz soh,

Riengz mwngz gou rox byaij doiq roen;

Gwn byaek gwn souh gvaq ndwenngoenz,

Vuet gaeu vuet oen mbiengj naj gvangq.

Go’gyoij mbaw laux diuz sim ndeu,

Faexndoek baenz deuz(diuz) hoh doiq hoh;

Mwngz go boux vunz singqcingz soh,

Riengz mwngz gou rox byaij doiq roen.

Baengzyoux roxsim cix doxngaeq,

Dungxsaej bohmaex aeu doxdoengz;

Gwn byaek gwn souh gvaq ndwenngoenz,

Vuet gaeu vuet oen mbiengj naj gvangq.

Sai: Ngoenzneix bungz nuengx yax baenzfuk,

Hawj boux vunzhuk bienq coengmingz;

Coengz neix bae naj geiq aencingz,

Gaulaeng aeu fwnz lij guhdoih.

Docih gwnzmbwn rox hai aen,

Ce boux mizsaem(sim) gungh baq duk;

Ngoenzneix bungz nuengx yax baenzfuk,

Hawj boux vunzhuk bienq coengmingz;

Ndaej gwn makit mbouj lau hat,

Raeuz bin bangxdat lumj diegbingz;

Coengz neix bae naj geiq aencingz,

Gaulaeng aeu fwnz lij guhdoih.

Mbwk: Caemh go guhdoih ceiq ndeimaez,

Lumj duz roeglaej haeuj nazhaeux;

Duzyiengz hwnj bya byaij roengaeuq,

Song boux ndeiraeuh caj gaulaeng.

Roegvenz daeh nyangj guh rongzmoq,

Mbin daengz gwnz mboq youh yiet nae (ciuz) ;

Caemh go guhdoih ceiq ndeimaez,

Lumj duz roeglaej haeuj nazhaeux.

Ngoenzlaeng aeu liu nyinh geiq naeuz,

Hawj song boux raeuz nyinh doxcaeuq;

Duzyiengz hwnj bya byaij roengaeuq,

Song boux ndeiraeuh caj gaulaeng.(sat)