Vujmingz Yen Gingloz Siujyoz dwg gih raeuz Cuengh Gun song saw vah sawqniemh hagdangz ndawde aen ndeu, daj 1981 nien hwnj, hagdangz couh guh Cuengh Gun song saw vah sonhag lo. Ginggvaq 30 lai bi roengzrengz guhhong, seizneix Gingloz Siujyoz gaenq dwg gij hagdangz guh hong Cuengh Gun song saw vah seizgan ceiq raez ndawde aen ndeu, dwg aen hagdangz guh Cuengh Gun song saw vah sonhag aeundaej cingzcik ceiq maenhndei ndeu.

Gingloz Siujyoz lij gig yawjnaek minzcuz conzdungj vwnzva gyauyuz, daegbied dwg gaenh geij bi daeuj, laebdingh le “ciepswnj minzcuz vwnzva, hungzyangz minzcuz cingsaenz, doedok minzcuz gyauyuz, gungganq vunzmoq minzcuz” aen banhhag muzbyauh neix. Comzrengz laemxsim guh hong minzcuz conzdungj gyauyuz. Hagdangz laebbaenz le “Lwggingloz” Yisuzdonz，moix boux hagseng cungj rox eu Fwencuengh, rox diuqfoux Bouxcuengh, cungj gyaez minzcuz vwnzva Bouxcuengh raeuz. Hagdangz daihlig fazcanj minzcuz vwnzva gyauyuz daegsaek, aeu ndaej cingzcik maenhndei.（Cinz Cicungh）