Cinzdangz Gih Hai Aen Hoih “Cuengh Gun Song Saw Vah Hagdangz Bi 2013

Seizcou Hong Haihag Caeuq 《Gocwngz Byauhcunj Sawcuengh》 Beizyin

Vihliux nda ndei hong Cuengh Gun song saw vah sonhag, Gveigangj Si Cinzdangz Gih Gyauyuzgiz youq bi 2013 ndwen 9 ngoenz 3 hauh hai aen hoih “ Cuengh Gun Song Saw Vah Hagdangz Bi 2013 Seizcou Hong Haihag Caeuq 《Gocwngz Byauhcinj Sawcuengh》Beizyin”. Baez hoih neix, miz gyauyuz giz lingjdauj、7 aen Cuengh Gun song saw vah sonhag hagdangz lauxsae daibyauj gungh 28 boux camgya.

Itcig daeuj, Cinzdangz Gih hong Cuengh Gun song saw vah sonhag guh ndaej haemq ndei, ndaej daengz boux lingjdauj baihgwnz haengjdingh, bouxlaux lwghag habhoz. Bi- neix, Cinzdangz Gih deng Swcigih Gyauyuz Dingh Minzcuz Gyauyuzcu dingh guh “Gvangjsih Cuengh Gun song saw vah gyauyuz sonhag sifan yen si (gih ) gensez”. Gij saehnieb Cuengh Gun song saw vah sonhag Cinzdangz Gih hix ndaej daengz demrengz caeuq fazcanj. Bi’neix haggeiz seizcou, Cinzdangz Gih Mungzgungh Yangh youh demlai song aen siujyoz hagdangz hengzguh Cuengh Gun song saw vah sonhag.

(Huz Bangjhangz)