Lozyez Yen baihdoengnamz miz aen mbanj he heuhguh Yizdangz Cunh, dwg mbanj Bouxcuengh. Daj Cunghvaz Yinzminz Gunghozgoz laebbaenz 60 lai bi daeuj, aen cunh neix ganbu guhvunz cingqging、aeueiq vunzlai、vih vunzlai okrengz; vunzlai gaenxguh、mbaetyungh, caemhyouq doxndei; ndawbiengz cianh maenhndei, mbouj miz anq hingzsw, neix ndaej heuhguh aen mbanj Bouxcuengh huzndei.

60 lai bi daeuj, Yizdangz Cunh dangjcihsuh miz 5 gaiq gvaq, doenghboux suhgi guhsaeh ndaw cunh cungj aeueiq vunzmbanj, guhvunz cingqging、mbouj lau gwnhoj、laemxsim vih vunzlai okrengz, gij guhfap ndei neix daihdaih doxcienz. Ndaw cunh neix cungj mbouj miz sizdangz, miz hek daeuj gwnngaiz、 ganbu okrog banhsaeh soqlaiz mbouj yungh cienzgoenggya haeuj fanden gwnngaiz, couh gag okcienz bae gwn faenj.

Lai bi daeuj, Yizdangz Cunh doenggvaq dinghguh doenghgij gvidingh ndaw mbanj daeuj fad gij hengzdoengh famhfap, yinx vunzlai soujfap. 1988 nienz, miz boux vunzmbanj he raemj 11 go faex mbanj, aeudaeuj guhranz, ndaw cunh fad de 1100 maenz, de nyinhfad hix mbouj hoznyap mbouj haemz bouxwnq. Vunzmbanj cungj nyinhnaeuz cijmiz gag okrengz canhngaenz cij cingqging, vunzlai cungj haenqrengz fazcanj swnghcanj, youq ndaw cunh neix guhcaeg ne vunzlai cungj mbouj hawj miz.

Gyoengq vunzhung、bouxgeq ndaw mbanj aeu swhgeij guhyiengh, gaenxguh、mbaetyungh, guh yiengh maenhndei hawj lwglan. Bouxhung guenj ndei lwgnyez, mbouj hawj lwgnyez guh saeh famhfap. 60 lai bi daeuj, Yizdangz Cunh mbouj miz saeh famh hingzfaz, neix daengx guek hix siuj miz.

(Couh Yizlanz Ginz Cinhveih)