Liujcwngz Yen Gujcai Mulauj- cuz Yangh Mbanjdanhdouz dwg aen mbanj Mulaujcuz comzyouq haenx. Gaenh bi daeuj, aen yienh neix giethab saedcaeq, comzrengz dajcaux“seiq daih gunghcwngz”, roengzrengz gensez Mbanjdanhdouz baenz mbanj daegsaek Mulaujcuz.

It dwg gunghcwngz ceihleix ndaw mbanj. Aen yienh neix gungh roengz 116 fanh maenz coih ndei doenghgij ranzgaeuq miz Mulaujcuz daegsaek haenx 37 aen、gaijguh ranzyouq 17 aen、dauqfuk ndei vehciengz rog douhung 11 giz、 coih mieng hung ndaw mbanj、ciengz dangjnamh、daemznyapnyaj daengj gihcuj sezsih.

Ngeih dwg gunghcwngz bu roensuijniz. Doenggvaq gyoebcomz gak bumwnz ok cienzngaenz 100 fanh maenz, saedhengz hanghmoeg youq Mbanjdanhdouz bu roensuijniz, gaijguh gij roen henz ranz aeu rin camh haenx, hawj beixnuengx Mulaujcuz caeuq baihrog doxlienz engq fuengbienh.

Sam dwg gunghcwngz gensez vwnzva. Doenggvaq cizgiz ceng ndaej cienzngaenz fazcanj saujsu minzcuz 100 fanh maenz, saedhengz giz baijok vwnzva minzcuz、gvangjcangz、dou bakmbanj nem gizdingzci、daiz guhsaeg daengj gihcuj sezsih gensez; yienh vwnzdijgiz roengz 25 fanh maenz gensez Mbanjdanhdouz minzsuz vwnzva cungsim.

Seiq dwg gunghcwngz aeu canjyez daiq fouq. Aen yienh neix giethab saedcaeq, comzrengz dajcaux Gujcai Mulaujcuz Yangh“bak、cien、fanh”Mulaujcuz funghcingz lijyouz gih, vih beixnuengx Mulaujcuz ra doenghgij canjyez hanghmoeg hab ngamj haenx, aeu neix daeuj bangcoengh demsou fouqmiz. (Veiz Ginzvah)