Ngoenzsinghgiz, daxboh cawx geij duz baeu ma cuengq youq ndaw cingj laeng ranz, heuh gou ndaejhoengq okbae yawjyawj.

Gou muengz buet gvaqbae, cijraen geij duz baeu youq ndaw cingj cingq mbehai geij“faggimz”, rig faenz rig heuj, ndaw bak cix mbouj dingz mbouj duenh dwk haiz bop okdaeuj.

Duzbaeu gig manz. Cijraen miz duz baeu ndeu bin hwnj gwnzlaeng lingh duz baeu bae, lumjbaenz saj gij youzheiq aemq vunz haenx; lij miz song duz baeu lumjbaenz gaenq gangj ndei gvaq nei, duz he ruenz daengz bien daemz, duz he cix ndwn youq gwnzlaeng duzhaenx benz hwnj bangxcingj bae, guh lumj siengj ruenz ok rog cingj bae nei.

Daengz banfuemx, gou sawq- mwh fatyienh geij duz baeu mbouj raen lo. Baenzneix, couh heuh daengx ranz vunz itheij bae ra.“Raen lo, raen lo!” Duz daih’it dwg gou ra raen, de cingq ruenz daengz bakdou ranzdajcawj doeng yawj sae muengh, lumjnaeuz siengj haeuj youh mbouj haeuj ranzdajcawj bae nei. Duz daih- ngeih dwg daxmeh raen, duzde ruenz youq ndaw hekding, cingq boemz youq dinghdingh yawj densi ne! Duz daihsam dwg daxboh ra raen, duzde cingq youq ndaw ungqdajcaemx vad bae vad dauq, lumjnaeuz yaek siengj dajcaemx nei. Lingh miz duz he boemz youq ndaw rug gou, cingq dinghdingh cimyawj gij dozveh nem gwnz bangxciengz haenx, laxlawz, geij duz baeu neix cingq daeuj canhgvanh ranz dou hane!

Yawj, gaej laihnaeuz duz- baeu bingzseiz byaij vang byaij raeh、rig faenz rig heuj, mbangjseiz de lij dwg yiengh- haenx manzgaengq ha.

(haj nienzgaep Yangz Cen)