Haenx dwg haet raemhfubfub ndeu, nit caeuq laep lumj aen roengz ndeu gyuemluemz youq gwnz dieg moix gok, rumzbaek maenj dwk, mbouj lau saek di dwk dauqcawq youz byaij, henzroen cumh nywj luenhnyabnyab haenx engq dwg rag dawz gaiq gaeu reuq ndeu, lumj aen dietsuj maenhmaenh dwk suj caemhcaiq fung aen sim gyoengqvunz. Hoeng, youq giz bak miz gai haenx, raeujrub dangqmaz, cungjsuenq miz giz hoengq gaebged ndeu, miz benq mbwn lamz fanh leix fouz fwj ndeu……

Youq bak gai, giz deihfueng yienzlaiz caembyambyam ndeu, seizneix nauhnyied dangq- maz, miz geij boux vunz simyou dwk byaij bae byaij dauq, hoeng, dingz lai vunz dauq lumj yawj heiq nei mizyinx dwk youq henz de yawj, fajnaj lij loh ok gij riu najna haenx…… Youq cungqgyang gyoengq- vunz gvaengz daeuj yawj haenx, miz dah lwgsau doeg gauhcungh ndeu cingq naengh youq gwnz dieg,gij faenz lumj nae ityiengh loenq youq diuz vaq niuzcaij moq de, loenq youq cik gen saeqset de, loenq youq fajnaj oiq youh hau de, loenq youq bwn’gyaeuj ndaemndwt de……Gwnz najbyak dah lwgsau loh ok naed naed hanh iqet seiqset, fajnaj lumj fan baengzhau deng vunz nu nyouq nei, mboujmiz saek di saek lwed, aen ndangdaej de dauqcawq cungj dwg sieng, lwed baez di baez di yaem okdaeuj, lumj baenz diuz baenz diuz mae- hoengz geuj dawz aen ndangdaej de, sawj de doenghdanh mbouj ndaej, duj rwz de lij naep miz naedsaekrwz. Yawj ndaej ok, de dwg dingq go seiz,deng ci bungq laemx lo, hoeng, boux haici gaenq hai ci deuz lo.

Dahsau naengh youq gizhaenx, hojyouq dangqmaz, song cehda yiengq seiqhenz muengh, de geijlai maqmuengh miz vunz ndaej bangbang de, hoeng, gyoengqvunz gvaengz youq henz de haenx, mboujmiz saek boux doengh, caenh ndwn youq gizhaenx yawj heiq. Dahsau raen yienghneix,siengsim dwk ngaem gyaeuj roengzdaeuj, gwnznaj mboujmiz saek di biujcingz. Raen yienghneix, ndaw sim gou in baenz raq baenz raq, gyoengqvunz neix caen dwgcaengz, mboujmiz saek di doengzcingz sim, ai! Dahsau neix cungj yaek dai lo, mbouj bang couh suenq lo, vanzlij youq gizhaenx doeng gangj sae gangj. Gou cingq siengj yamq hwnjbae raeuz de hwnjdaeuj seiz, miz boux dax’au daenj buh seuqset ndeu, byaij daengz henz ndang de, caenciet dwk cam dahsau neix:“Mwngz baenzlawz yiengh lo? Deng sieng gizlawz la? Youqgaenj lwi……”De itmienh gangj, itmienh siujsim dwk raeuz dahde hwnjdaeuj. Dahsau neix saemxsaemx saxsax dwk ndwn hwnjdaeuj, raemxda ronghlik haenx gaenq youq ndaw da cienq. Boux dax’au haenx gaenjgip cam:“Mwngz gizlawz in la?” Dahsau unqnaiq dwk naeuz:“Cik ga……”Seizneix, gou cij yawj daengz: Dahsau cingq aeu cik ga ndeu cengj youq gwnzdieg, lingh cik ga mbouj rox doengh, danghnaeuz mbouj cujyi, daengx bouxvunz cungj deng laemx roengzdaeuj. Dax’au youh cam:“Bae yihyen yawjyawj ba?” Dahsau ganjgip ngauz gyaeuj:“Gou mboujmiz ngaenz……”Dax’au naeuz:“Mbouj youqgaenj, sien bae yihyen yawjyawj cij ndei, ngaenz gou menh gaijgez!” Gangj sat, de doiq henzndang boix vunzsai daenj sihcangh daepdangq, haiznaeng rongh’wenq caemhcaiq miz aen gyauzceh hauzvaz ndeu haenx naeuz:“Mwngz soengq de bae yihyen ndaej lwi? Ngaenz, gou menh ok!”Boux vunzsai haenx baez dingq, doeksaet liux, vuengmuengz naeuz:“A……Gou? Gou……Gou……Aen ci gou mboujmiz youz lo, gou yaek bae gyayouz cij ndaej, mwngz bae ra lingh boux ba!” Gangj sat, boux vunzsai neix gyaeuj cungj mbouj nyeux ganjvaiq byaij okbae, doq byaij doq damz naeuz:“Fatbag, hawj gou soengq, guh fangzhwnzloq ba! Danghnaeuz de naeuz gou bungq de baenzlawz guh ne? Vunz mwnh cij soengq!”Dahsau raen yienghneix le,couh naeuz:“Mbouj……Mbouj yungh lo, gou mbouj bae!” Hoeng, boux dax’au neix cij dwg damzdingz dwk riuriu, naeuz:“Mbouj youqgaenj, gou vad ci soengq mwngz bae!”Gangj sat, de couh okbae vad ci!

Youq de vadfwngz mwhhaenx, ndaw sim gou miz geu diemzsubsu ndeu nyoenx okdaeuj……

(指导老师：黄素艳)