Moix boux ndawsim cungj miz aen siengjmuengh he, siengjmuengh naengz diemjdawz feizmbaw sengmingh, ciuq- rongh diuzloh baenaj, vix cingcuj fuengyiengq.

Daj iq gou couh gyaez veh veh, cijaeu miz doxgaiq hawj gou veh, mboujguenj baenzlawz hoj veh, gou cungj naengz ciuq gij yiengh haenx veh okdaeuj. Seizneix majhung le, gou lij ciuqyiengh gyaez veh veh. Mboujguenj dwg sujgyaj roxnaeuz dwg hanzgyaj, couh lienz ngoenzsinghgiz gou cungj dwg hag veh veh. Veh veh mboujdanh hawj gou yawj ndaej gyae yawj ndaej gvangq, caemhcaiq lij fungfouq gij cihsiz gou. Mbouj yungh gangj, aen siengjmuengh gou haengjdingh dwg dang boux canghdajveh he lo, gou hozhaenz haujlai vunz, cienz dwg gyoengq canghdajveh okmingz he, gou siengj, seizlawz swhgeij hix naengz baenz boux canghdajveh okmingz he ne! Cingq dwg aenvih gou laeb aen muzbyauh hungsang neix, ndigah gou cingq seizseiz haenqrengz dwk.

Moix aen singhgiz ngoenz singhgiz roek, gou cungj bae ranz Bangz lauxsae hag veh veh. Geiqndaej gou dwg caeuq Cangh Gyahhwngz itheij bae. Hainduj, lauxsae cij hawj dou veh di dozhingz genjdan he, caj dou hag rox gihbwnjgungh le caiq ciemhciemh gya laeg, gienh saeh neix aeu seizgan nanz di. Seizneix, gou gaenq dwg aen ranzdajveh neix ndawde boux hag ndaej ceiq vaiq lo, gaenq hag baegonq Cangh Gyahhwngz donh hung he.

Daj veh gij dozhingz genjdanh daengz veh doxgaiq caen, gou bungz gvaq haujlai daemdengj, hoeng gou coengzlaiz mbouj doeknaiq gvaq, gou ciengzciengz veh dwk haeujmaez bae, lumzgeiq seizgan, raen song aen cungdaeuz gvaq ndaej gig vaiq. Gou couh dwg yienghneix youq ndaw aen haij gvangqlangh meijsuz cwxcaih dwg youzlangh.

Vihliux saedyienh dang canghdajveh aen siengjmuengh neix, gou mboujduenh haenqrengz, daihdamj dwk bae mienh- doiq daemdengj caeuq muznanh. Cijaeu gou haengj haenqrengz, gou couh liz baenzgoeng yied daeuj yied gyawj. Gou aeu vih aen muzgyauh swhgeij haenqrengz bae guh.

(seiq nienzgaep Gangh Yungjlieng)