Vahgonq: Youq ndawbiengz yienh Vanz- gyangh, miz cungj doxbang guhhong ndeu heuhguh “guhdoxhuh、guhvaj”, lumj ranz lawz aeu raemj fwnz coemh cien coemh vax, aenvih hong lai, couh cingj vunz mbanj gyawj haenx daeuj banggoeng, ngoenzlaeng caiq boizgoeng, aeu ngoenz suenq goeng. Yienghneix, gyoengq bouxcoz sai mbwk mwh guhhong couh eu fwenyoux doxdaeuq guhcaemz.

Sai: Neix guh doxhuh bae aeu liu,

Byaeu vax ndaw yiuz caj liu coq(yungh);

Mwngz nuengx nda daeuj aennaj moq,

Cingj cam mingzcoh ndei roxmij.

Duz roegvameiz gwnz nga douh,

Cauj duh gwn souh hwnj Byayiuz;

Neix guh doxhuh bae aeu liu,

Byaeu vax ndaw yiuz caj liu coq.

Roeggae raennaj cix doxhaen,

Mbungqmbaj raen daeng cix daeuj coh(lox);

Mwngz nuengx nda daeuj aennaj moq,

Cingj cam mingzcoh ndei roxmij.

Mbwk: Doxhuh aeu liu daeuj caemh go,

Fukndei goj gyo cawjranz ngaeq(gyaez);

Coh gou heuhguh nuengx mbwknaeh,

Hawj go guh maex mwngz lij yiemz.

Youh haemq mwngz go aen singq coh,

Gangj vah ei soh nyaenx cix gyo;

Doxhuh aeu liu daeuj caemh go,

Fukndei goj gyo cawjranz ngaeq.

Duzvaiz ndaej coh cix youq gaeu,

Duzroeg bak gaeuz heuhguh gaeq;

Coh gou heuhguh nuengx mbwknaeh,

Hawj go guh maex mwngz lij yiemz.

(caengz sat)