□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Miz boux buzlaux vunzdog ndeu saek ngoenz daengz laeuzhung cawx genj, genj ngamq gai caez, de haemq mbouj angq. Gij dungzci aen cujsaeq neix naeuz: “Daxbuz, caen doiq mbouj hwnj, seizneix mbouj miz genj lo, mwngz louz aen diegyouq hawj dou, caj miz genj le dou doq soengq hawj mwngz, mboujnex mwngz youh deng buet baez dem.” De gaenbonj mbouj saenq miz dingz vunzgaihuq baenzneix simsoh, cij gangj aen cohgai okdaeuj cix deuz lo. Gvaqlaeng, laeuzhung buenq ndaej genj ma le, gij dungzci cujsaeq gonqlaeng bae ra le seiq baez, doeklaeg cix ra deng buzlaux haenx, soengq gaiq genj ndeu daengz ndaw fwngz de. Buzlaux haenx raemxda rim gvaengz, lienzsing naeuz:“Gij vunz- gaihuq Laeuzhung Bakhuq caen dwg gangj daengz cix guh daengz, sou dwg gij vunzgaihuq ndei Mauz Cujsiz.”

Veiz Gozcingh haenhndei gij cingsaenz Fu Canvaz caeuq aen cujsaeq de cienzsim cienzeiq fuzvu hawj lwgminz haenx, muengh de caeuq gij dungzci aen cujsaeq de laebdaeb roengzrengz, baujciz mingzdaeuz, laeb goenglauz moq hawj lwgminz!

Fu Canvaz gig gyo’mbaiq gij goengdaeuz swcigih caeuq ndaw si haenx daeuj ngonz de. De naeuz: “Gij hong dou lij caengz guh ndaej ndei, gvaqlaeng itdingh roengzrengz dem, hawsim dingq gij yigen vunzlai, guh hong fuzvu ndei bae.”

Daj Laeuzhung Bakhuq byaij okdaeuj, Veiz Gozcingh cam gyoengq boux doengzdoih de ngoenzneix ngonz hawciengz le miz maz gamjsiengj?

Yenz Gvanghcaij naeuz: “Doxgaiq menhmenh lai hwnjdaeuj lo.”

Vangz Gwzginz naeuz:“Yawjraen maqmuengh lo.”

Gvangh Yenz naeuz:“Vunzlai najriu lai lo.”

Veiz Gozcingh naeuz: “Deng! Caenhguenj raeuz lij miz haemzhoj, cijaeu cwngcwz deng, guh ndei hong, Guengjsae dingh ngoenz hwng gvaq ngoenz.”

(caengz sat)