□ Luz Yuzgangh/陆如刚

(ciep geiz gonq)

Gaengawq swhliu geiq miz roxriuj, Raemxdiuqdat Vangzgojsu gvangq miz 81 mij, sang 74 mij. Daxbaenh Dahbwzsuijhoz youq duenh gwnz lij dwg lae ndaej numqnot unqswnh, siengj mbouj daengz de lae hamj caek dat neix le, foedfwd bienqbaenz raemxdoengjsasa, bienq- baenz yiengh ciengzmienh fanh max doxbuet! Daxbaenh de lij dwg caemrwgrwg lae dwk, seizneix cix fat ok gij sing hawj mwngz yaek rwznuk! Mwngz yawj, ga raemxdah daj caek sang bongh roengz lajdat daeuj, gienjhwnj hoenzraemx baenz ciengh sang, varaemx sinz gvaq seiqhenz, baez raen yiengh ciengzmienh neix, lwedndang gou sikhaek riengz de goenj hwnjdaeuj. Youq neix mwngz gag rox naemj daengz “bonghmbin roengz laj sam cien cik, aiq dwg dahmbwn doek lajbiengz” hot sei neix. Yienznaeuz hot sei neix dwg Lij Bwz sij daeuj danq raemxdiuqdat Luzsanh, hoeng seizneix dawz de daeuj danq diuz raemxdiuqdat dangqnaj neix hix gig ngamj. Gou youh siengj daengz Mingzcauz Ciz Yazgwz youq bonj- youzgeiq de yienghneix sij diuz raemxdiuqdat neix:“Lumj cienfanh diuz baengzcaeuz gaq youq rog dou, raemx sinz gvaq seiqhenz lumj naedcaw ngaiz loenq nei daj dieg sang doek roengz laj daeuj, fugfauz nyonx dwk, bienqbaenz mokraemx swng hwnj sang, yienghceij hungloet ndeiyawj”. Gou yawjngonz gvaq geij diuz raemx- diuqdat, doxbeij cix rox, yienznaeuz Raemxdiuqdat Dwzdenh raemx lai youh gvangq, hoeng gou roxnyinh de mbouj gaeuq sang; yienznaeuz Raemxdiuqdat Dahmaxlingx caek gaeuq sang, hoeng de youh raemx noix gvaq bouh. Dauqyawj diuz Raemx- diuqdat Vangzgojsu neix, dat sang raemx lai, ndwn youq henzgyawj, roxnyinh deih doengh bya ngauz, ciengzmienh ndeiyawj! Hix nanzgvaiq de ndaej aen mingzdaeuz “Yacouh daih’it raemxdiuqdat” lo!

Gou ndonj gvaq geh vunzlai, byaij daengz dieggyawj yawjngonz. Youq dieggyawj yawj, gou yawjraen duzciqcungz gyaeundei he gaq gvaq dangqnaj seuqsak bae, lumjnaeuz hawj mwngz yiet fwngz couh gaem ndaej de nei. Gou haeujsim bae yawj, couhcinj raemxdiuqdat coi gij mokraemx yaep gvaq gaeulawz cungj miz, hoeng duzciqcungz vanzlij dwg dingh- saebsaeb gaq youq dieggaeuq, lumjdwg daegdaengq hawj hekyouz yawjngonz geubuh caet saek de nei. Ciqcungz hawj gingjgih Raemxdiuqdat Vangzgojsu yienjndaej engq miz hozlig、engq funghfu lai yiengh.

Ciuhgeq cienzgangj, ciqcungz dwg aengiuz dawz vunzbiengz caeuq mbwn doxlienz he, byawz raen ciqcungz byawz couh vuenyungz. Dwg lo, gou siengjsiengq, seizneix de cingq yinx gyoengqraeuz byaij haeuj aen seiqgyaiq maezvaeg he bae, youq ndawde, raeuz ndaej haeujyinx dingqngonz hot gyauhyangjgiz youz daswyenz danzciengq he, hawj raeuz roxnyinh lumj fiz lumj ngveiz……

Raemxdiuqdat Vangzgojsu, mwngz dwg naedbauj Yinzgvei Gauhyenz! Cienfanh bi daeuj goek- raemx miz mwngz mbouj dingz mbouj duenh doengjsasa, Dahcuhgyangh cix rox bongh haeuj ndaw rungj daihhaij bae! （sat）