Canghyw naeuz, moix bi daengz cou doeng geiqciet, cungj miz mbangj bouxlaux baenz bingh sim sailwed aenvih gwn bouj mbouj ngamj baenz haexgaz engq youqgaenj, deng soengq bae yihyen ciengjgouq.

Yenzyinh yungzheih baenz haexgaz gig lai, cawz le caeuq aenndang、cingzsi mizgven le, lij caeuq gij cozyung yw、mbangj bingh yingjyangj、swnghhoz sibgvenq rwix mizgven maedsaed. Seizcou caeuq seizdoeng vunzraeuz haengj aeu yinzsinh、loegyungz、bit gaeq bya noh daeuj gwn bouj, baenzneix daih bouj rox hawj haexgaz engq gyanaek.

Boux baenz haexgaz daegbied dwg bouxlaux miz gvanhsinhbing roxnaeuz bouxlaux baenz hezyaz sang haenx, aenvih mwh ok haex seiz yunghrengq aengq ok, cauhbaenz binghsimdaeuz raemhrwnh fatbingh, cungj cingzgvang neix youq linzcangz mwnzcinj ciengzseiz fatseng, daegbied dwg vunzbiz engq yungzheih fatseng cungj cingzgvang neix.

Ndigah, gij bouxlaux baenz gvanhsinhbing caeuq bouxlaux baenz hezyaz sang haenx, baujciz ok haex doengswnh beij gwn bouj engq youqgaenj.

Seizcou gwn bouj, gawq aeu nyinh bouj, engq aeu yungzheih siuvaq. Gaej gwn hojgoh, siuj gwn manhget, gwnndoet aeu citdamh guhcawj, lai gwn raemx、iengduh、cij daengj gijgwn hamz dansuij vahozvuz、danbwzciz、youzlauz caeuq gai、linz、diet、hwzvangzsu lai nem gijgwn dingj vaih hezsonh haenx, gawq ndaej ciengx ndang baujgen, youh mbouj yungzheih baenz haexgaz.