Yiengzbya caeuq mouduenh doxiu bae gwnz bya gip raetmoguh. Songde byaij daengz byongh bya seiz, sawqmwh dingqnyi caz rum henz loh cienz daeuj sing gyangz. Songde byaij gvaqbae baez yawj, dwg duz maxloeg raiz ndeu, laemx dwk ga raek lo, cingq ninz youq gwnzdieg gyangz dwk. Maxloeg raiz naeuz:“Bonjlaiz gou siengj hwnj bya bae gip raetmoguh, siengj mbouj daengz deng laemx ga raek lo, mazfanz sou ram gou baema ranz ndaej lwi?”

“Ndaej, mbouj miz vwndiz!”Yiengzbya baenzneix naeuz. De caeuq mouduenh raemj song go faex caeuq ra geij diuz gaeu guh baenz aen gyaqram ndeu, ram maxloeg raiz hwnj gyaqram le, couh boux gonq boux laeng ram maxloeg raiz baema ranz lo.

Byaij haujlai nanz cij ram maxloeg raiz daengz ranz. Maxloeg raiz cibfaen docih:“Docih song sou lo, danghnaeuz mbouj miz song sou, goulau gou couh dai youq gwnz bya lo. Caen mbouj ndei eiqseiq, mbouj miz maz doxgaiq ndei daeuj docih sou, gou youq bakdou ndaem sek sae’gva ndeu, seizneix hix cingq cug lo, mazfanz sou mbaet geij aen baema gwn ba.”

Maxloeg raiz dawz song aen daeh okdaeuj faen hawj mouduenh caeuq yiengzbya boux aen.

Maxloeg raiz caeuq mouduenh daeuj daengz ndaw reih mbaet gva. Yiengzbya ngamq mbaet ndaej aen ndeu, mouduenh gaemz heiq ndeu couh mbaet ndaej seiq aen, yaepyet couh cang daeh rim lo.

Songde caeuq maxloeg raiz doxbiek le, ngamq byaij daengz byongh roen, mouduenh couh baeg dwk diem mbouj ndaej heiq lo:“Aeyoz, gou aemq mbouj doengh lo.” De gig sij mbouj ndaej dwk daj ndaw daeh dawz aen sae’gva ndeu okdaeuj ndekce henz loh.

Youh byaij duenh loh ndeu, mouduenh youh dingz din roengzdaeuj naeuz:“Daiq naek lai lo, gou saedcaih aemq mbouj doengh lo.” De youh daj ndaw daeh dawz aen sae’gva ndeu okdaeuj ndekce henz loh.

Youh byaij duenh loh ndeu, daengzlaeng dauq daengz ranz lo. Mouduenh cuengq sae’gva roengz mbaq, caekhaex soeg naengh roengz gwnzdieg bae, heiq baegngabngab. Caj yietnaiq ndei le, de daj ndaw daeh dawz sae’gva swhgeij okdaeuj yawjyawj, youh yawjyawj yiengzbya, naeuz:“Gij sae’gva gou beij mwngz aen iq. Caen seih lo, rengz gou beij mwngz hung, aemq gij sae- gva dauqma yawz cungj mbouj beij gij mwngz aen hung ne?”

Yiengzbya riu lo:“Mwngz naeuz neix dwg maz yienzaen ne?” (Cangh Senhcwn)