Daengzcog guekcoj baenzlawz yiengh ne?

Daengzcog miz ngoenz he, daehsuliu cungj bienqbaenz cungj daeh fuengbienh dawz youh ndaej sou dauq baenzyungh he, heiqci cungj bienq baenz daiyangznwngz heiqci lo. Gyasae daengj doxgaiq aeu faex guh haenx cungj gaij yungh cungj suliu gig nyangq he daeuj guh, gyoengqvunz mbouj caiq raemj faex lo. Raemxuq cijaeu dauj roengz aen doengj gauhgohgi he bae couh bienqbaenz raemxcingh youh caiq baenz yungh, mbouj caiq miz vunz sai raemx raemj ndoengfaex lo, ndaw dah ndaw haij gungq baenz bang bya baenz doih, caemhcaiq mbouj caiq miz raemxrongz, bya engq heu, raemx engq cingh, mbwn engq lamz……

Daengzcog miz ngoenz he, ranzranz cungj miz boux vunzgihgi he, cijaeu bouxvunz naengh youq gwnz sahfaz nap yauzgung, de couh rox mbouj dingz mbouj duenh bang mwngz guhhong, lij rox bienqbaenz heiqci daiq mwngz bae gizdieg mwngz siengj bae haenx, lij naengz daeb baenz dennauj, couh lienz boux gingjcaz gwnz loh hix dwg vunzgihgi……

Daengzcog miz ngoenz he, aen ranzlaeuz dou youq haenx ndaej daeb hwnjdaeuj; byaij haeuj hagdangz, cijmiz gaiq diegnywj iq he, cijaeu nap naed denniuj, couh ndaej soengq mwngz roengz laj deih bae hagsib, gij ciengz ndaw gyausiz hix ndaej seizbienh gaijbienq nganzsaek, hwnjdangz seiz gij ciengz lai saek lai yiengh, roengzdangz le gij ciengz couh bienqbaenz saekloeg……

Daengzcog miz ngoenz he, dou ranzranz cungj miz yijcou feihconz, ngoenzciet ngoenz- cuengqgyaj couh ndaej naengh bae singhgiuz wnq guhcaemz youzlangh, seizhaenx, moix boux cungj rox yungh gauhgohgi, lumj duzroeg nei, mbin hwnj mbwn hwnj fwj bae, ndaej cwxcaih dwk bae daengz guekcoj gak dieg youzlangh……

Daengzcog miz ngoenz he, gohyozgyah lij fatmingz cungj doxgaiq he, dawz gij vah Yiz、Yingh、Ngoz daengj guek conj baenz gij vah raeuz, yienghneix Cungh、Yiz、Yingh、Ngoz daengj guek gyoengq baengzyoux iq couh rox dox gangjgoj gyau baengzyoux lo……

Daengzcog guekcoj engq gyaeundei, hoeng gij gyaeundei haenx aeu cihsiz caeuq gohgi bae saedyienh, gou siengsaenq, guekcoj raeuz itdingh baenz gwnz seiqgyaiq aen guekgya ceiq maenh- ak、ceiq fouqmiz he.(Veiz Li)