Youq ndaw hagdangz gyaeundei youh dwggyaez dou, fatseng gvaq haujlai saeh mizyinx, gizneix sing riu rimcwt. Youq gizneix, dou vaiqvued dwk hagsib.

Youq ban dou, couh fatseng gvaq gienh saeh mizyinx he. Dangz daihngeih lingz roengzdangz baez yiengj,mbangj doengzhag couh lumj gyoengq roeg deng gyaeng youq ndaw loengz ndaej hai douloengz, vaiqvet mbin ok gyausiz, yienghsouj gij cwxcaih roengzdangz. Ndaw gyausiz, mbangj doengzhag gangjgangj riuriu, cibfaen nauhyied, caezgya cungj mbouj rox miz geij boux hek saenzmaed cingq caegcaeg “byaij” gvaq neix daeuj.

“Vungvung”, gij sing riu ndaw gyausiz deng gij sing neix gyaux lo, ngamq hainduj, sing gig iq, doeklaeng, sing yied daeuj yied hung, guhdwk gij angqriu ndaw gyausiz cungj siusaet liux. Gij sing yiengj neix daj gyawz daeuj ne? Gyoengq doengzhag itheij bae cimh, doeklaeng, ra raen gizdieg fat sing okdaeuj haenx——conghcueng. Gyoengq doengzhag yawj ok conghcueng bae, moengzmoengz myoxmyox yawjraen song naed ndaem haemq hung, miz di doengzhag gangjriu naeuz:“Va, vaiq yawj, song duz saehaexmax.” Sikhaek, ndaw gyausiz youh cienz ok sing riu. Sing riu gingdoengh song duz “saehaexmax”, songde mbatndeu“fw”mbin hwnjdaeuj. “Va!”Ndaw gyausiz miz vunz ginghemq hwnjdaeuj. Song naed ndaem neix mbin gyawj gyoengq doengzhag, mbat neix, gyoengq doengzhag yawj cingcuj lo, laxlawz dwg song duz doq. Gyoengq doengzhag mbwk damjsiuj haenx sikhaek deuz ok gyausiz, mbangj doengzhag sai yaek gaeb duzdoq, hoeng gyoengqde caengz bungq duzde, duzde gaenq mbin hwnjdaeuj, gyoengq doengzhag sai hix deng hwk lo. Gyoengq doengzhag mbwk gvai heuh lauxsae daeuj, cinjbi mied song duz manzgyaengq neix bae.

Lauxsae baez daeuj, gyoengq doengzhag sikhaek couh miz ingbaengh lo, cungj ndoj haeuj baihlaeng lauxsae bae. Lauxsae gaenq miz cinjbi. Gij fap ndei lauxsae dwg——ywgajnon. Lauxsae dawz bak bingz doiqcinj song duz doq, caengz ndaej nap bakbingz roengzbae, song duz de youh mbin daengz lingh aen cueng lo. Lauxsae youh gyaep bae riengz. Hoeng song duz doq iq neix lumjbaenz baihlaeng miz lwgda nei, cungj naengz deuzndoj lauxsae dou. Song duz doq youh hopheux denfunghsan mbin geij hob, lumj dwg daegdaengq nyex lauxsae. Lauxsae roengz gietsim, itdingh aeu mied song duz doq neix. Mbat neix, lauxsae yawj cinj seizgei, cij dingqnyi “cici” song sing, song duz doq couh doek roengz gwnz cueng, duz he doek roengz laj cueng bae lo, duz he deng gyoengq doengzhag vaxaeu dawz daeuj guh sizyenbinj, duz neix vih gohyoz saehnieb vutndang lo.

Duzdoq deng mied lo. Seizneix, lingz hwnjdangz yiengj lo, gyoengq doengzhag cungj dauqma gyausiz youhcaiq hainduj gaenjsieng youh vaiqvued dwk hagsib lo.(Maj Loz)